Wekîla DEM Partiyê ya Mûşê Sumeyye Boz derbarê talana xwezaya ya li Mûşê û herêmê tê domandin axivî û diyar kir ku li Kurdistanê proje ne tenê ji bo aboriyê lê ji bo “fetisandina jiyanê” tên amadekirin. Sumeyye Boz li dijî talana xwezayê banga têkoşîna hevpar kir.
Wekîla DEM Partiyê ya Mûşê Sumeyye Boz, têkildarî projeyên Santralên Enerjiya Jeotermal (JES) ên li Vartoyê û talana li ser Çemê Muradê û Deşta Şênê, ji ajansa me re axivî. Sumeyye Boz, bal kişand ser polîtîkayên texrîbata ekolojiyê yên li Kurdistan û Kurdistanê û destnîşan kir ku li herêmê xweza bi polîtîkayên “ewlehiyê” tê talankirin.
‘Li Kurdistanê armanc qirkirina jiyanê ye’
Sumeyye Boz diyar kir ku daristanên wan tên talankirin, avên wan tên jehrîkirin û wiha got: “Ev projeyekî dagirkeriyê ye. Li aliyê Tirkiyeyê ev polîtîka bi hişmendiya aborî û kapîtalîzmê tên meşandin. Lê gava mijar dibe Kurdistan, polîtîkayên ewlehiyê yên sed salan hatine meşandin û kapîtalîzm digihîjin hev. Li vir her cure tunekirin, qirkirin û fetisandina jiyanê derdikeve holê.”
‘Divê gelên li Mûşê mil bidin hev’
Di berdewama axaftina xwe de Sumeyye Boz, bal kişand ser rewşa pirçandî ya Mûşê û wiha banga têkoşîna hevpar kir: “Mûş ne bajareke homojen e, tê de Ereb, Tirk, Kurd, Laz û Çerkez hene. Parastina Mûşê, bi helwesta jiyaneke demokratîk pêkan e. Ji bo afirandina jiyaneke nû û civakeke demokratîk, divê em têkoşîna ji bo xwezayê û azadiya jinê berfireh bikin û têkiliya wan a bi hev re bihonin.
‘Heta encameke hiqûqî tê bidestxistin divê têkoşîn bidome’
Sumeyye Boz, derbarê nîqaşên li ser “pêvajoyê” tên kirin sekinî û di pêvajoyê de bal bişand ser rola Rêberê Gelê Kurd Abdullah Ocalan. Sumeyye Boz destnîşan kir ku heta pêvajoyek şênber û hiqûqî neyê avakirin, divê têkoşîn neyê sistkirin û wiha dawî li axaftina xwe anî: “Heger em têkoşînê nekin û bibêjin ‘pêvajo heye’, em ê winda bikin. Desthilatdarî polîtîkayên xwe berdewam dike, em ê jî têkoşîna xwe bikin. Her çiqas hêviya me ji aştiyê hebe jî, divê em îhtimala biryarên neyînî yên desthilatdaran jî, ji bîr nekin.”
