Gerînendetiya Giştî ya AVKAMEDê piştî nûçeya ajansa me ket tevgerê û biryar girt ku Tesîsa Sefandina Ava Bikarhatî ya Biyolojîk a Pêşketî ku Çemê Dîcleyê qirêj dike, bi awayekî demkî bigire û li ser tesîsê dixebite.
Gerînendetiya Giştî ya Kargêriya Av û Kanalîzasyonê ya Amedê (AVKAMED) ya Şaredariya Bajarê Mezin a Amedê li Tesîsa Sefandina Ava Bikarhatî ya Biyolojîk a Pêşketî ku xesarê dide Çemê Dîcleyê daxuyanî da. Daxuyaniyê li tesîsê pêk hat. Daxuyanî bi Kurmancî û Tirkî hat xwendin.
Ajansa me roja 21ê Mijdarê derxistibû holê ku ava qirêj ango berşoyî ji tesîsê diherike Çemê Dîcleyê. Ji ber vê ava nepaqij Dîcle jehrî û qirêjî dike. Li ser nûçeya me AVKAMED ket nav tevgerê.
Midûrê Yekîneya Kanalîzasyonê Abdullah Kayhan daxuyaniya Tirkî xwend û daxuyaniya bi Kurmancî jî Midûrê Şaxa AVKADEMê Şeref Kaplan xwend.
Ji bo çareseriya ava qirêj tesîs bi demkî hat girtin
Şeref Kaplan diyar kir ku hewldanên modernîzasyonê yên ku pergala pompakirinê ya Tesîsa Paqijkirina Ava Berşo ya Biyolojîk a Pêşketî tên kirin ji sala 2003yan ve hatiye xebitandin û got: “Ji ber ku pompeyên heyî kevn dibin, nikarin parastina ewlehiya pergalê ya domdar bikin. Ev jî girtina tesîsê ya demkî mecbûr dike. Tesîsa me dê di navbera 25ê Mijdarê û 15ê Kanûna Pêşîn a 2025an de ji bo operasyonên dermankirina demkî bê rawestandin. Ev biryar li ser bingeha prensîbên endezyariyê û hewcedariyên teknîkî hate girtin da ku pêşî li hilweşîna potansiyel a pergalê, rijandina bêkontrol û zirara jîngehê ya demdirêj bigire. Divê ev girtina demkurt wekî garantiya ewlehiya jîngehê ya demdirêj were hesibandin.”
Dê hewl bidin rê li ber qirêjkirina Çemê Dîcleyê bigirin
Şeref Kaplan anî ziman ku ew ê bi girtina demkî ya tesîsê tespîta paqijiya li ser Çemê Dîcleyê bikin û wiha got: “Di vê heyamê de rijandina hemî berşoyî ya nav Çemê Dîcleyê ji bo 15-20 rojan dikare qirêjiya berbiçav û stresa ekolojîk di çem de çêbike. Dê dezenfekte bê kirin. Ekosîstema çem dikare vî barî bi awayekî demkî tehemûl bike. Di vê çarçoveyê de dê xetereya rastî ya li ser çem derkeve holê. Armanca me ew e ku heta 15ê Kanûnê em tesîsa xwe bi pergalek pompkirinê ya nûjenkirî bi kapasîteya tevahî ji nû ve çalak bikin û tenê ava paqijkirî bi domdarî û bi ewlehî berdin Çemê Dîcleyê. Em ê derheqê vê pêvajoya ku me biryar li serê girtiye û encamên wê bi rêkûpêk bi raya giştî re parve bikin. Em ê li ser prensîbên şefaftiyê bixebitin û hewl bidin ku xetere çênebin.”
Nûçeya me ya derheqê tesîsê de wiha ye: https://ajansawelat.com/ji-tesisa-avkamede-jehri-diherike-dicleye/
