Şirnex – Di pêşengtiya MEBYA-DERê de şîna endama YPJê Hava Ûgûrlûyê ku li Reqayê jiyana xwe ji dest dabû, bi awayekî girseyî hate ziyaretkirin.
Ji bo endama Yekîneyên Parastina Jin (YPJ) Havva Ûgûrlû (Rûken Botan) ku di 21ê Çileyê de li bajarê Reqayê yê Bakur û Rojhilatê Sûriyeyê jiyana xwe ji dest dabû, li gundê Melêsê yê navçeya Elkê ya Şirnexê şîn hate danîn. Şîn, bi girseyî hate ziyaretkirin. Endam û rêveberên partiyên siyasî, nûnerên saziyên sivîl ên civakî û gelek welatî bi pêşengtiya MEBYA-DERa Şirnexê de çûn serdana şînê. Girseya ku di têketina gund de kom bû, bi dirûşmên “Şehîd namirin” û “Bijî berxwedana Rojava” ber bi cihê şînê ve meşiyan.
‘Mezinkirina têkoşîna wê erk û peywîra me ye’
Hevseroka MEBYA-DER a Şirnexê Emîne Akiş di serdanê de axivî. Beriya serdanê ji bo cangoriyên azadiyê deqîqeyek rêz hate girtin. Emîne Akişê destnîşan kir ku destkeftiyên Rojava encama bedelên hatine dayin e.
Hevseroka DEM Partiyê ya Şirnexê Taybet Bîlgî jî anî ziman ku dîwarên tirsê bi pêşengtiya têkoşîna jinan hatine hilweşandin û wiha got: “Rûken, hevrêya me bû. Mezinkirina têkoşîna wê û bicihanîna xeyalên wê, erk û peywira me ye.”
‘Heke behsa yekîtiya Kurdan bê kirin, xêra lêhengên jiyana xwe ji dest dane ne’
Wekîlê DEM Partiyê yê Amedê Serhat Eren jî anî ziman ku gelê Kurd bi sedan sala ne ji bo hebûna xwe têdikoşe û wiha axivî: “Li ku derê zordestiyek hebe, li wir berxwedan heye. Heke zilm hebe, lehengên Kurdistanê jî hene. Gelê Kurd di dîroka xwe de tu caran serî netewandine. Heke îro behsa yekitiya Kurdan were kirin, ev bi xêra lehengên jiyana xwe ji dest dane ne û Rêberê Gelê Kurd Abdullah Ocalan e. Em dixwazin bi hev re bijîn. Ev jî bi naskirina gelê Kurd dibe.”
Şîn, piştî kirina duayan bi dawî bû.
