Amed – Endama Komîteya Amadekar a Navendî ya Newrozê Sema Koç bandor û encama Newroza îsal ya li ser gelê Kurd nirxand û destnîşan kir ku ev Newroz ji hemû salên bihûrî cudatir bû û bi beşdariya sed hezaran kes peyama azadî û yekîtiyê da û got: “Dîsa hat destnîşankirin ku gel dixwaze Rêber Apo Newroza sala bê di nav me de be.”
Newroza îsal bi dirûşma “Newroza Azadî û Yekîtiya Demokratîk” li dehan navend hate pîrozkirin. Bi milyonan kesên tev li pîrozbahiyên Newrozê bûn, peyamên xurt dan. Bi milyonan kes xwestin azadiya fîzîkî ya Rêberê Gelê Kurd Abdullah Ocalan pêk were û yekîtiya gelê Kurd çêbibe.
Endama Komîteya Amadekara Navendî ya Newrozê Sema Koç a Endama Meclîsa Partiyê ya DEM Partiyê derheqê pîrozbahiyên Newrozê û peyamên hatin dayîn de ji Ajansa Welat re axivî.
‘Li qadê helwesta polîtîk hebû’
Sema Koç diyar kir ku pîrozbahiyên Newroza îsal bi kelecaniyeke mezin dest pê kir û ev coş û kelecan li qadan veguherî helwesteke xurt. Sema Koç anî ziman ku gelê Kurd; Newrozê ne tenê weke şahiyekê, lê wekî qadeke polîtîk dibîne û wiha got: “Di bin baran û sermayê de jî gel li qadan bû. Dizanin ku ji bo çi tên. Ev yek, hem ji bo Amedê hem jî ji bo bajarên din, newrozeke pir cuda derxist holê û wekî pêngavekê bû.”
‘Daxwaza azadiya fîzîkî ya Rêber Apo hate xwestin’
Sema Koç bal kişand ser daxwaza sereke ya gel a li qadên pîrozbahiyên Newrozê de û destnîşan kir ku peyam û wêneyên Rêberê Gelê Kurd Abdullah Ocalan li her derê bûn û got: “Daxwaza gel ev e ku Rêber Apo êdî bi awayek fizîkî li derve be. Me jî li her qadê ev yek dît; bi ruh, bi wêne, bi peyam û bi dirûşmeyan gelê Kurd helwesta xwe da nîşandan. Îsal Rêber Apo bi ruh û peyamên xwe bi me re bû, lê hêviya me ew e ku sala pêşiya me ew bi fîzîkî jî di nav me de be.”
‘Ji çar aliyên Kurdistanê peyamên yekîtiyê hate dayîn’
Sema Koç qala girîngiya yekîtiya neteweyî ya gelê Kurd kir û wiha axivî: “Ji çar aliyên Kurdistanê; ji Rojava, Başûr, Rojhilat û ji Ewropayê peyamên hevgirtinê gihaştîn Amedê. Hat diyarkirin ku bi taybetî piştî xwedîderketin û berxwedana ji bo destkeftiyên Rojava, li qadan xwedîderketineke xurt ji bo yekîtiya demokratîk û neteweyî derketiye pêş. Ev peyamên hevgirtinê li ser gel bandoreke erênî ya mezin çêkiriye.”
‘Daxwaza aştiyek mayînde heye’
Sema Koç di dawiya axaftina xwe de anî ziman ku pankart, daxuyanî û dirûşmeyên li qadan nîşan dan ku daxwaza pêvajoya aştî û civaka demokratîk li ser civakê bandoreke erênî ya mezin kiriye û wiha axivî: “Dirûşmeyên ji bo azadiyê bi yek dengî hatin qîrkirin û li her derê olan da. Me ev hemû bi coşeke mezin dît û guhdar kir. Gelê Kurd bi dil û can dixwaze ku ev pêvajo li pêş bikeve û aştiyeke mayînde pêk were.”
