Li Ceyhan, Îskenderûn û Tarsûsê pîrozbahiyên Cejna Newrozê hatin lidarxistin û daxwaza azadiya fîzîkî ya Abdullah Ocalan û girtiyên siyasî hat kirin.
Pirozbahiyên bi dirûşma “Newroza Azadî û Yekitiya Demokratîk” tên lidarxistin berdewam dikin. Îroj li navçeya Ceyhan a Edeneyê, li navçeya Îskenderûn a Hatayê û li navçeya Tarsûsê ya Mêrsînê pîrozbahiyên Newrozê hatin lidarxistin. Platforma Saziyên Demokratîk, rêveberên partiyên siyasî, nûnerên saziyên sivîl ên demokratîk, û gelek welatî tev li pîrozbahiyan bûn. Di pîrozbahiyan de welatî bi cilên xwe yên neteweyî û herêmî li ber stranên hatine strandin govend gerandin, dirûşmên daxwaza azadiya fîzîkî ya Rêberê Gelê Kurd Abdullah Ocalan û girtiyên siyasî dikin hatin berzkirin.
EDENE
Li Qada Newrozê ya Taxa Belediyeevlerî ya navçeya Ceyhan a Edeneyê bi dirûşmên “Newroza azadî û yekitiya demokratîk” û “Newroza azadî û demokrasiyê” pîrozbahiyên Cejna Newrozê hat lidarxistin. Welatiyên hatin qadê, li ber stranan bi saetan govend gerand. Gelek kes bi cil û bergên Kurdî tev li bûn û dirûşmên “Jin, jiyan, azadî”, “Newroz pîroz be” û “Bijî Serok Apo” hatin berzkirin.
Daxwaza azadiya fizîkî ya Abdullah Ocalan
Dayikên Aştiyê agirê Newrozê hilkir û bi hilkirina agir re coşa girseyê jî derket lûtkeyê. Dayikên Aştiyê, daxwaza azadiyê ji bo Rêberê Gelê Kurd û hemû girtiyên siyasî kir. Hevserokên DEM Partiyê yên Ceyhanê Emîne Baykarayê û Tahir Ozdemîr, Newroza gel pîroz kir. Hevserokê DEM Partiyê yê Bajar Seyfettîn Aydemîr jî got ku di pêvajoyeke dîrokî de ne û daxwaza azadiya fîzîkî ya Abdullah Ocalan kir.
‘Bila statuya bê naskirin’
Wekîlê DEM Partiyê yê Wanê Zulkuf Uçar di pîrozbahiyê de axivî û got ku bexwedana gelê Kurd a li dijî polîtîkayên dewletê didome. Uçar, da zanîn ku gelê Kurd û gelên Tirkiyeyê îsal jî di Newrozê de daxwazên xwe yên demokrasî û azadiyê anîne ziman. Uçar, got: “Gelê Kurd xwest statuya wan bê naskirin, mafê xwe yê perwerdeya bi zimanê dayikê bi kar bîne û girtiyên siyasî bên berdan.” Uçar, anî ziman ku divê dewlet guh bide daxwazên li qada Newrozê û zext û zordariya dewletê şermezar kir.
‘Gel li qadan xwedî li pêvajoyê derket’
Di berdewamê de Uçar xwest hemû girtiyên siyasî bên berdan, dewlet di çarçoveya pêvajoyê de gavan biavêje û wiha pê de çû: “Neavêtina gavan, li dijî ruhê aştiyê ye. Li her çar parçeyên Kurdistanê ji bo yekitiyê îradeyeke xurt derketiye holê. Ev pêvajo dê hêj xurtir bibe. Gelê Kurd li qadên Newrozê xwedî li vê pêvajoyê derket û divê dewlet demildest gavan biavêje. Em bang dikin ku hebûna gelê Kurd bê naskirin û azadiya wan bê misogerkirin.”
Pîrozbahiya Newrozê bi stranên hunermendan û gerandina govendê bi dawî bû.
HATAY
Li Qada Newrozê ya Taxa Yildirimtepe ya navçeya Îskenderûn a Hatayê jî bi heman dirûşman pîrozbahiya Cejna Newrozê hat lidarxistin. Li qada pîrozbahiyê gelek caran dirûşmên “Şehîd namirin” û “Yek e yek e yek e, gelê Kurd yek e” hatin berzkirin. Endamê PM’a DBP’ê Kerem Nalbant û endamê MYKa EMEPê Halîl Îmrek di axaftinên xwe de îşaret bi pêvajoyê kirin.
‘Heke behsa aştiyê dikin divê deriyê Îmraliyê vekin’
Wekîlê DEM Partiyê yê Mêrdînê Kamûran Tanhan jî di pîrozbahiyê de şehîdên Newrozê bi bîr anî û got: “Her wiha şehîdê xwe yê nemir Salih Muslim ku ji bo aştî û xwişk-biratiya gelan têdikoşiya jî bi rêzdarî bi bîr tînin. Daxwaza îsal a qadên Newrozê azadiya birêz Ocalan bû. Birêz Ocalan balê dikişîne ser aştî û demokrasiyê. Em jî dê xwedî li banga 27ê Sibatê derkevin. Em ê dengê aştî, demokrasî û azadiyê bilindtir bikin. Niha li Rojhilata Navîn Şer heye û birêz Ocalan ji bo aştiyê hewl dide. Heke behsa aştî û demokrasiyê bikin, wê demê bila deriyê Îmraliyê vekin.”
Piştî axaftinan, agirê Newrozê hate vêxistin. Pîrozbahî, bi stranên hunermendan û gerandina govendê bi dawî bû.
MÊRSÎN
Li Taxa Mîthatpaşa ya navçeya Tarsus a Mêrsînê jî piştî 10 salan pîrozbahiya Newrozê hat lidarxistin. Nûnerên rêxistinên girseyî yên demokratîk û bi hezaran kes tev li bûn. Di tevahiya pîrozbahiyê de dirûşmên “Bijî Serok Apo” û “Jin, jiyan, azadî” hatin berzkirin. Pîrozbahî bi rêzgirtinê dest pê kir. Piştre jî Hevserokên DEM Partiyê yên navçeyê Medîne Kanat û Kadrî Ezer beşdar silav kirin û Newroza wan pîroz kir.
Hevseroka DEM Partiyê ya Mêrsînê Bedriye Kuşê got ku gel li qadên Newrozê xwedî li pêvajoyê derketiye û bertek nîşanî girtin û binçavkirinên piştî Newrozê da.
Wekîlê DEM Partiyê yê Mêrsînê Alî Bozan jî got ku gel di Newrozê de xwedî li ziman, çand, nirx û Rêbertiya xwe derketiye.
Piştî axaftinan, Dayikên Aştiyê agirê Newrozê hil kir. Di dema vêxistina agirê Newrozê de dirûşma “Bijî Serok Apo” hate berzkirin û posterê Abdullah Ocalan hate hilgirtin. Pîrozbahî, bi stranên hunermendên Sanatolia Kolektîf Atolyelerî û gerandina govendê bi dawî bû.
