Ji bo şervanê YPGê Şerzan Sason li navçeya Soke ya Aydinê şîn hat danîn û mewlûd hat xwendin. Di merasîmê de peyama “Em deyndarê şehîdên xwe ne” hat dayîn.
MEBYA-DERa Egeyê û DEM Partî ya Aydinê, ji bo şervanê YPGê Şerzan Sason (Îsmet Atalay) ku di 18ê çileya 2026an li Eyn Îsayê jiyana xwe ji dest dabû, li navçeya Sokeyê ya Aydinê şîn hat danîn û mewlûd hat xwendin. Li cihê şînê pankartên ku wêneyên Şerzan Sason li ser bûn hatin daliqandin.
Tevî Parlamenterê DEM Partiyê yê Wanê Mahmut Dîndar; Dayikên Aştiyê, DEM Partiyê yên bajar û navçeyên Îzmîr û Aydinê, Komeleya Piştevanî û Alîkariyê ya Malbatên ku di Dergûşa Şaristaniyê de Xizmên Xwe Winda Kirine ya Egeyê (MEBYA-DER EGE), Komeleya Alîkarî û Piştevaniya bi Malbatên Girtî û Hikumxwaran re ya Egeyê (EGE-TUHAYDER), Komeleya Lêkolînên Çand û Ziman a Avesta, Tevgera Jinên Azad (TJA) û gelek welatî beşdarî şînê bûn. Bername bi xwendina mewlûdê dest pê kir. Piştre bi deqîqeyek rêzgirtinê berdewam kir û dirûşmeyên “Şehîd namirin” hatin berzkirin.
‘Ji bo hemû malên Kurdan spartî bin li ber xwe da’
Di serî de xwişka Şerzan Sason, Naîme Atli axivî û diyar kir ku şehîd şehîdê hemû gelê Kurd e û got: “Berî 11 salan ji mala me derket û ji bo hemû malên Kurdan spartî li ber xwe da. Serê her kesî sax be, serê hemû gelê Kurd sax be.”
‘Edî azadî û serkeftin her demê bêtir nêzî me ye’
Piştre Dayika Aştiyê Feyruze Kurt sarsaxî ji malbatê, Rêberê Gelê Kurd Abdullah Ocalan û gelê Kurd re xwest û got: “Mazlûm Dogan 3 darikên kibrîtê vêxistin. Mahsûm Korkmaz fîşeka ewil teqand û îro îradeyeke me ya ku gihîştiye mîlyonan heye. Êdî azadî û serkeftin ji her demê bêtir nêzî me ye.”
‘Ne komploya 15ê Sibatê bi ser ket, ne jî ya li ser Rojava’
Hevserokê MEBYA-DERê yê Egeyê Mikaîl Atan jî anî ziman ku Şerzan Sason ne şehîdê ewil e lê ew bawer dike ku dê bibe yê dawî û got: “Em hemû ji cihên cuda yên Kurdistanê ber bi vir ve hatin sirgûnkirin; xwestin me li her derê belav bikin û bihelînin. Lê me ev yek şikand û di her şert û mercî de yekîtiya xwe ava kir. Îro em hîn jî ji bo xwedîderketina li şehîdên Kurdistanê li vir, li Aydinê tên cem hev. Tu kesî texmîn nedikir ku ev tevgera ku bi rê ketîye, dê bi vî rengî li Kurdistanê reh berde. Di demeke nêz de bi komployeke mîna ya 15ê Sibatê, êrîşeke navneteweyî birin ser Rojava. Lê hemû dinyayê careke din dît ku ne komploya 15ê Sibatê bi ser ket, ne jî ya li ser Rojava. Divê neyê jibîrkirin ku ya ku hişt em ji van komployan rizgar bibin, bedelên ku şehîdên me dane bi xwe ne.”
‘Divê em li pêvajoya Aştî û Civaka Demokratîk xwedî derkevin’
Hevserokê DEM Partiyê ya Aydinê Husnu Taş jî diyar kir ku ew di şexsê Şerzan Sason de li ber hemû şehîdên Kurdistanê bi rêzdarî xwe ditewîne û got: “Serê me hemûyan û serê Rêber Apo sax be. Dost û dijmin her kes bila baş bizane ku hema bêje hemû Kurdan ji bo ziman, çand, hebûn û doza xwe bedelên mezin dane û her tim amade ne bedelan bidin. Li her bihosta axa Kurdistanê xwîna birayên me û zarokên me heye. Ev têkoşîn bi hêsanî nehat van rojan û bi hêsanî jî nagihe encamê. Divê em vê baş bizanibin û ji bo têkoşînê bêtir bixebitin. Xwediyê vê partîyê em in; divê em vê baş bizanibin û mil bidin milê hev. Di vê çarçoveyê de divê em xwedî li pêvajoya Aştî û Civaka Demokratîk derkevin.”
‘Heger Serokatî nebûya îro kurd tunebûn’
Parlamenterê Wanê yê DEM Partiyê Mahmut Dîndar diyar kir ku 2000 kîlometre dûrî Kurdistanê xwedîderketina gel a li nirxên xwe pir bi qîmet e û destnîşan kir ku Kurd deyndarê şehîdên xwe ne û hêvî dike ku ev pêvajoya hatiye destpêkirin dê aştiyê bîne Tirkiye û Kurdistanê û got: “Aştî û azadî herî zêde heqê me ye. Çimkî ji bo aştî û azadiyê, zarokên me di bin şert û mercên giran de li çiyayên Kurdistanê têkoşiyan. Ev pêvajoya ku hatiye destpêkirin bi keda zarokên me hat bi dest xistin. Em ê bi ser bikevin û em bi ser dikevin jî. Em hêvî dikin ku di demeke nêz de Rêberê Gelê Kurd Abdullah Ocalan jî azad bibe û em ê bi hev re wî pêşwazî bikin. Gav bi gav em ber bi xeyalên şehîdên xwe ve diçin. Divê em vê pêvajoya ku Serokatiyê daye destpêkirin baş fêm bikin. Ji bo qirêjkirina pêvajoyê gelek polîtîka tên meşandin, divê em van fêm bikin û li gorî wê helwestekê nîşan bidin. Em dizanin ku ya em gihandine van rojên aştiyê rêxistinbûyîna me û Serokatî ye. Heger Serokatî nebûya, îro Kurd tunebûn.”
