Amed – Koordînatorê Çandê yê Şaredariya Farqînê Fesîh Çetînkaya diyar kir ku ew îro dest bi serlêdana 2yemîn Pêşbirka Çîrok û Helbestê ya Serê Gulanê dikin û got: “Pêşbirka me xwedî diyarî ye. Em bi van xebatên çand, hunerî û wêjeyî dixwazin li ber bişaftinê bisekinin û ji holê rakin.”
Şaredariya Navçeya Farqînê ya Amedê Pêşbirka Çîrok û Helbestê ya Serê Gulanê ya 2yemîn li dar dixe. Şaredariyê ji bo tevlibûna pêşbirkê serlêdanê da destpêkirin. Mijara pêşbirkê “Vejîna Merwanî û hatina biharê” ye. Xelat dê ji bo berhemên ku bi zaravayên Kurmancî yê Kurdî beşdar dibin bê dayîn. Berhemên ku berê di pêşbirkan de hatibin parvekirin di vê pêşbirkê de dê neyên bijartin. Her wiha berhemên ku bi hişê çêkirî hatibin wergerandin dê neyên qebûlkirin.
Her kesek tenê bi çîrokek û helbestekê dikare tev li pêşbirkê bibe. Beşdarên pêşbirkê divê dosyeyên xwe bi awayê wordê ji meîla şaredariyê re bişînin. Ew ê di pêşbirkê de heta rêza sêyemîn beşdar bê xelatkirin. Kesê/kesa yekemîn wê bi 15 hezar lîreyî bê xelatkirin, kesê/a duyemîn bi 10 hezar lîreyî û kesê/a sêyemîn jî bi 5 hezar lîreyî bê xelatkirin. Dîrokên qebûlkirina berheman ango serlêdana ji bo pêşbirkê ji 1ê Nîsanê dest pê dike û heta 1ê Gulanê dê berdewam bike.
‘Em dixwazin çîrokbêj û helbestvan tev li pêşbirkê bibin’
Koordînatorê Çandê yê Şaredariya Farqînê Fesîh Çetînkaya diyar kir ku wan sala borî dest bi xebatên xwe yên çandî kirine û îsal jî ew Pêşbirka Çîrok û Helbestê ya Serê Gulanê ya 2yemîn li dar dixin û wiha got: “Ji ber ku me cara yekemîn dest pê kiribû di vî milî de ecemîtiya me jî hebû. Serlêdan û kêfxweşiya gel jî hebû. Îsal jî em ê ya duyemîn dest pê bikin. Em ê di 1ê Nîsanê de dest bi serlêdanan bikin, dê heta 1ê Gulanê bidome. Me amadekariyên xwe ji bo pêşbirkê dan destpêkirin. Em niha li benda serlêdanan e. Em dixwazin her kesek ku bi çîrok û helbestê ve mijûl serlêdan bike. Di navbera serlêdanan de jî dê berhemên hatine bên nirxandin. Di 14-15ê Gulanê de kesên ku di pêşbirkê de bi ser ketine, em ê xelatên wan bidin. Em ê pere xelatî wan bikin.”
‘Em dixwazin zarok bi Kurdî mezin bibin’
Fesîh Çetînkaya bi bîr xist ku sala par jî pêşbirkê li dar xistibûn lê ji ber rewşa hewayê pirsgirêkên teknîkî derketibûn û ew hewl didin li gel Şaredariya Bajarê Mezin a Amedê bernameyek hevpar amade bikin. Çetînkaya da zanîn ku xebatên wan ên çand, ziman û hunerê didomin û dersên muzîkê jî didin zarok û ciwanan. Çetînkaya bi bîr xist ku ew hewl didin cihek çandê ava bikin. Çetînkaya diyar kir ku kargehên wan ên ji bo zarokan jî berdewam dikin û got: “Em gelek caran dersên dîrok û xwezaya Kurdistan didin zarokan. Em her cure lîstikên Kurdî nîşanî zarokan didin. Em dixwazin dersên piyano, keman, wêne, şanoyê jî bidin zarokan lê niha ewqas derfetên me tune ne. Em dixwazin di her warî de li ber bişaftinê bisekinin. Bangewaziya me li dayik û bavan e, li ser zimanê xwe bisekinin û bila têkilî, hişmendî û xewn û xeyalên zarokan bikin bi Kurdî. Em dikarin wisa li dijî vê bişaftinê bisekinin û li ber xwe bidin. Armanca me ew e ku em her derê bikin Kurdî.” Çetînkaya anî ziman ku ew dixwazin zarokan di warê sînemayê de jî li pêş bixin û fîlmên Kurdî bi wan bidin temaşekirin.
Çetînkaya destnîşan kir ku di bin banê şaredariyê de Koroya Kulîlkên Zembîlfroş a Zarokan û Koma Rîtmên Jiyanê ya Erbanê hatine sazkirin û xebatên hunerî bi rê ve dibin.
