Wan – Parêzer Kadîr Kutevî têkildarî pêvajoya bi Abdullah Ocalan re tê birêvebirin axivî û da zanîn ku divê ji bo pêşîgirtina pirsgirêkan û silametiya birêvebirina pêvajoyê di destûra bingehîn de qanûnek bê amadekirin.
Rêberê PKKê Abdullah Ocalan, di 28ê Kanûna 2024an de li gel Şandeya Partiya Wekhevî û Demokrasiyê ya Gelan (DEM Partî) Pervîn Bûldan û Sirri Sureyya Onder pêk tê, hevdîtinek kir. Di encama vê hevdîtinê de Şandeya DEM Partiyê bi partiyên siyasî yên Meclisê ne re hevdîtin pêk anîn û ev hevdîtin weke destpêka pêvajoyeke nû hat pênasekirin.
‘Divê qanûnek bê derxistin’
Endamê Baroya Wanê û Şaxa Komeleya Hiqûqnasên ji bo Azadiyê (OHD) a Wanê parêzer Kadîr Kutevî ku ev bi salan e li ser mafên mirovan dixebite têkildarî pêvajoya tê birêvebirin axivî. Kadîr Kutevî bal kişand ser gotinên Rêberê PKKê Abdullah Ocalan û da zanîn ku ev pêvajoya tê meşandin bi xwesteka Serokê MHP Devlet Bahçelî dest pê kir. Kadîr Kutevî gotinên Abdullah Ocalan bi bîr xist û got: “Divê di destûra bingehîn de bingeheke hiqûqî hebe ji bo vê pêvajoyê. Ji ber ku divê ev pêvajo li ser esasekê bi rê ve biçe ku li hemberî astengiyan têk neçe. Ka dê çi bidin Kurdan, li ser çi hevdîtin bên kirin divê di destûra bingehîn de cih bigire. Li ser gotegotan be dibe ku ev pêvajo zû têk biçe.”
‘Divê astengî ji bo Abdullah Ocalan neyên derxistin’
Kadîr Kutevî bal kişand ser rola Abdullah Ocalan û diyar kir ku gelek saziyên fermî yên dewletê jî diçûn Îmraliyê bi Abdullah Ocalan re hevdîtin dikirin. Kadîr Kutevî anî ziman ku ji aliyê dewlet û desthilatê jî gelek kes heyranê fikrên Abdullah Ocalan in û wiha got: “Abdullah Ocalan xwedî mêjiyeke kûr e. Di Rojhilata Navîn de jî xwedî roleke mezin e. Gelek daxuyaniyên dewletê heta yên Hakan Fîdan bi xwe jî hene ku dibêjin Abdullah Ocalan dikare aştiyekê pêk bîne. Lê divê ji aliyê hiqûqî ve astengî jê re neyên derxistin û hinek maf bên dayîn.”
‘Divê bi hemû partî û saziyên Kurdan re hevdîtin pêk bê’
Kadîr Kutevî derheqê şandeya DEM Partiyê de jî axivî û bi lêv kir ku şande baş e, lê ji bilî vê şandeyê gelek şandeyên dewletê jî diçin girava Îmraliyê. Kadîr Kutevî da zanîn ku divê ev şande li gel hemû partî, sazî û dezgehên Kurdan jî hevdîtinê bike û ev yek anîn ziman: “Ji bilî DEM Partiyê gelek partiyên Kurdan hene, divê li gel wan jî hevdîtinek bê kirin da ku bersiva ‘Kurd çi dixwazin?’ bi girtin. Divê fikir û ramanên Kurdên din ankû partiyên din jî bê guhdarkirin ku hem aştiyeke navxweyî hem jî aştiyeke derveyî Kurdan pêk bê. Ji bo siberoja Kurdan li gor min tişta herî baş ev e.”
‘Aştî dê ji bo hemû gelan baş be’
Kadîr Kutevî têkildarî encama pêvajoyê destnîşan kir ku divê ji bo DEM Partî û Abdullah Ocalan ti astengî dernekevin da ku ev pêvajo bi silametî bi rê ve biçe û got: “Divê dewlet û desthilat pêşiya hemû pirsgirêkan bibire. Ev aştî dê ji bo hemû gelên Tirkiyeyê baş be û dê di Rojhilata Navîn de jî bibe mînak. Ez dîsa dûbare dikim ku divê nirxekî weke qanûn bê derxistin ku ev pêvajo bi hêsanî bi rê ve biçe û ti pirsgirêk dernekevin. Wekî din wê xetere be.”
