Ji ber geşedanên şer yên dawî helwesta danustandinên di navbera Amerîka û Îranê de jî guherîn. Îranê daxwaza Amerîkayê ya ji bo agirbesta 48 saetan red kir.
Şerê DYA-Îsraîl û Îranê berdewam dike. Di 24 saetên dawî de bi xistina balafirên şer yên Amerîkayê û gefên tund ên Donald Trump şer hat qonaxeke din. Îran ragihand ku wan du balafirên şer xistine. Derbarê mijarê de Washingtonê daxuyanî piştrast kir û diyar kir ku pîlotek wan ê di balafira şer de hatiye rizgarkirin.
Xistina balafiran û rewşa pîlotan
Hêzên parastina hewayî ya Îranê li ser çapameniya fermî ya Îranê ragihandin ku wan li herêma Kohgîluye û Boyir-Ehmedê balafireke F-15E Strike Eagle û li nêzî Tengava Hurmizê jî balafireke A-10 Warthog xistine.
Çavkaniyên Pentagonê û Jerusalem Post piştrast kirin ku yek ji pîlotan di operasyoneke taybet de hatiye rizgarkirin, lê pîlotê duyemîn hîn winda ye. Ajansa nûçeyan a Fars ya Îranê, îro ji çavkaniyek ku navê wî nehatiye aşkerakirin, ragihand ku Tehranê pêşniyara Amerîkayê ya ji bo agirbesta 48 saetan red kiriye. Çavkanî anî ziman ku pêşniyar duh bi rêya dewletek din hatiye pêşkêşkirin. Her wiha ajansê ragihand ku rejîma Îranê daye zanîn ku kesê pîlotê winda bibîne û radestî wan bike dê bi xelat bikin.
Trump Îranê bi gefên tund hişyar kir
Serokê Amerîkayê Donald Trump, piştî xistina balafiran daxuyaniyên pir tund dan. Trump diyar kir ku heke Îran daxwazên wan qebûl neke dê di nav 2-3 hefteyan de êrîşên pir mezin û tund pêk werin. Her wiha hat gotin ku hemû santralên elektrîkê dê werin rûxandin û Îran dê “vegere serdema kevirî”.
Îsraîlê ji bo rizgarkirina pîlot heta demekê êriş rawestandin
Artêşa Îsraîlê (IDF) ragihand ku wan ji bo piştgiriya operasyona rizgarkirina pîlotê Amerîkî, êrîşên xwe yên asmanî li hundirê Îranê bi awayekî demkî rawestandine. Lê belê, Îsraîlê êrîşên xwe yên li ser baregehên Hizbullahê yên li Libnanê bi dijwarî berdewam kirin.
Îran: Binesaziya herêmê di bin gefê de ye
Rayedarên Îranê hişyarî dan ku heke Amerîka êrîşî santralên wan ên elektrîkê bike, ew ê hemû binesaziya enerjiyê ya welatên hevalbendên Amerîkayê yên li herêmê bikin hedef. Herwiha Îranê tawanbariyên hedefgirtina rafîneriyên Kuweytê jî red kir.
