Wezareta Xezîneyê ya DYAyê, derbarê 7 fermandarên Haşdî Şabî de biryara mueyîdeyan girt. DYAyê ev kom wekî “terorîstên kurevî” pênase kir û bang li Bexdayê kir.
Wezareta Xezîneyê ya Dewletên Yekbûyî yên Amerîkayê (DYA), derbarê 7 fermandarên di bin banê Haşdî Şabî de biryara mueyîdeyên aborî da. Di daxuyaniya wezaretê de hat diyarkirin ku ev nav di plankirin û pêkanîna êrîşên li dijî berjewendiyên Amerîkayê de cih girtine.
Ofîsa Kontrolkirina Malên Biayan (OFAC) ya ser bi Wezareta Xezîneyê ve ragihand ku kesên di lîsteya mueyîdeyê de ne, bi komên wekî Hizbullah, Tevgera Nuceba, Esayîb Ehl el-Heq û Tugayên Seyîd el-Şuheda re têkildar in. Di daxuyaniyê de hat destnîşankirin ku ev kom di nav pêkhateyên herî radîkal de ne û wekî “terorîstên kurevî” tên pênasekirin.
Hişyarî ji bo Bexdayê
Li aliyê din, Wezareta Karên Derve ya DYAyê jî daxuyaniyek belav kir û diyar kir ku piştgiriya wan ya ji bo Iraqeke bi îstîkrar, serwer û pêşketî berdewam dike. Wezaretê hişyarî da rêveberiya Bexdayê û xwest ku axa Iraqê ji bo çalakiyên îstîkrara herêmê têk dibin neyê bikaranîn.
DYAyê bang li Bexdayê kir ku komên çekdar ên bi derve re girêdayî ne werin tasfiyekirin û ji bo parastina nûnertiyên biyanî û kesên li welat gavên ewlehiyê bênavêtin.
