Rêxistina DEM Partiyê ya Îzmîrê, dê giliya polîsên ku sîxurtiyê li ser endam û pêkhateyên wan ferz dikin, bike.
Rêxistina DEM Partiyê ya Îzmîrê têkildarî hewldanên sîxûrkirinê yên polîsan, li avahiya xwe daxuyanî da. Gelek kes tev li daxuyaniyê bûn. Rêveberê Şaxa OHDê Mehmet Yûnûs Çelîk di daxuyaniyê de got ku di nava 2 hefteyên dawî de li dijî partiyiyan û xwendekaran nêzikatiyeke derhiqûqî ya sîstematîk ketiye dewrê. Çelîk, diyar kir ku kesên xwe weke polîs didin naskirin li kafeyeke navçeya Konakê xwendekarê zanîngehê revandiye û gefa terkkirina bajar lê xwariye. Her wiha destnîşan kir ku welatiyekî nû ji girtîgehê derketî jî hatiye revandin, gef lê hatiye xwarin û bi vî awayî xebatên sîxûrtiyê li ciwan û jinan tên ferzkirin.
‘Walî înkar kir’
Yûnûs Çelîk anî ziman ku ferzkirina sîxûrtiyê sûc e û wiha domand: “Ev hewldan dikeve nava sûcên gefxwarin, heqaret, îşkence, bêparhiştina şexs a ji azadiya xwe, xerab bi kar anîna peywirê. Dema bi awayekî sîstematîk hate kirin jî dibe sûcê li dijî mirovahiyê. Di hevdîtinên bi walî re de ev sepan hatiye înkarkirin. Em ê li dijî van sepanan mafên xwe yên yasayî bi kar bînin û mijarê bişopînin.”
‘Gef li jin û ciwanan tê xwarin’
Wekîla DEM Partiyê ya Îzmîrê Burcugul Çubukê jî diyar kir ku hevserokên navçeyan û kesên tev li xebatên partiya wan tên şopandin û wiha pê de çû: “Şaxa Têkoşîna li Dijî Terorê ya Emniyeta Îzmîrê gefan li jin û ciwanan dixwe û hewl dide bike sîxûr. Kesên tev li çalakiyên weke 8ê Adarê û Newrozê bûn, rê li ber tê girtin, diçin kafeyên wan û telefonan jê re dikin û tacîz dikin. Lê ew çi bikin jî dê nekarin bi ser kevin.”
Parlamenterê DEM Partiyê Îbrahîm Akin jî got ku piştî hevdîtina bi walî re tu bersiveke şênber ji wan re nehatiye dayîn, hinek hêzên cuda yên di nava dewletê de hewl didin endamên partiya wan krîmînalîze bikin, êdî tehemûla wan nemaye û got: “Dixwazim vê bi taybetî bibêjim; di destê me de belge hene. Agahiyên wan, plakayên wan hene. Em ê der heqê wan de serlêdana sûc bikin. Dibe ku xwe pir bihêz bibînin lê bila li aqûbeta waliyê Dêrsimê û kurê wî binêrin. Dê heman tişt bi serê we jî were. Ya ku hûn dikin sûc e. Lewma dev ji gef û zexta sîxûrkirinê berdin. Nexwe dê navên we yek bi yek bi raya giştî re parve bikin û we teşhîr bikin. Divê emniyet û walîtî tavilê pêşiya van hewldanan bigire.”
Banga serlêdanê
Seroka Şaxa OHDa Îzmîrê Fatma Demîrer jî bi bîr xist ku dema polîs tiştekî dikin mecbûr in girteka wê bigirin û îmze bikin û bang li hemû welatiyan kir ku dema gefek lê tê xwarin an jî bêusûliyek li dijî wan tê kirin, yekser serî li DEM Partî, OHD, ÎHD û saziyên din bidin.
