Meşa Dirêj di roja 5an de li Rouenê ye dewam kir. Siyasetmedar Faysal Sariyildiz beşdarî meşê bû û xwest her kes piştgirî bide pêngava azadiyê û got: “Kurd bêtir nêzî azadiyê ne.”
Meşa Dirêj ku 21ê çileyê di çarçoveya Pêngava “Ji Rêber Apo re azadî ji pirsgirka Kurd re çareseriya siyasî” de destpê kir, di roja 5emîn de li bajarê Rouen ê Fransayê dewam kir.
Çalakvan li qada Saint Sever a Rouenê kom bûn û daxuyaniya çapemeniyê dan. Çalakgeran piştî daxuyaniyê bi beşdariya Kurdistanî û dostên wan dest bi meşê kirin. Siyasetmedar Faysal Sariyildiz jî piştgirî da çalakiyê.
Di meşê de gelek caran dirûşmeyên “Ji Ocalan re Azadî”, “Bijî berxwedana Rojava”, “Bijî berxwedana Tişrînê” berzkirin. Çalakvanan danezanên bi zimanê Fransî ya derbarê Pêngava ji Rêber Apo re Azadî ji Pirsgirka Kurd re Çareserî û wateya Meşa Dirêj a 26 rojan de hate belavkirin. Meşvanên ku gihiştin Place Du Justice li vir mitîngek lidarxistin. Mitîng bi deqeyek rêzgirtina ji bo şehîdên berxwedana Tişrînê û Kurdistanê destpê kir.
Siyasetmedar Faysal Sariyildiz di mitîngê de axivî û got: “Wekî gelê kurd, em pir nêzîkî azadiyê ne. Hûn dizanin, pêvajoyek di sala 2013yan de destpê kir. Tevgera azadiyê û gelê kurd bi dilsozî nêzî vê pêvajoyê bûn. Rêber Apo dîsa dixwest ku pêvajoyê bi berpirsiyariya mezin û civakî ya mezin pêk bîne. Lê belê, dewleta tirk bi qirkirin û şer bersiv da. Bajarên me şewitandin û rûxandin. Wan gelê me qetil kirin. Dewleta Tirk bi hemû hêza xwe êrîşî Kurdan dike. Wan got em ê hilweşînin, îro ew dewleta Tirk hat ber hilweşînê.
Pêngava di 10ê Cotmeha 2023yan de ji bo azadiya fîzîkî ya Rêber Apo hatiye destpêkirin, bandorek mezin li ser çareseriya pirsgirêka kurd kiriye. Divê her kes xwe berpirsyar bibîne, hêz û piştgiriyê bide pêngavê. Meşa 15ê Sibatê ya 26an wê li Strasbourgê bi dawî bibe. Bi taybetî gelê me yên ku li Fransayê dijîn, divê beşdarî çalakiyê bibin.”
Piştî axaftina Faysal Sariyildiz, daxuyaniya bi Fransî ya li ser pêngava ji Rêber Apo re azadî ji pirsgirêka Kurd re çareserî hat xwendin.
