Di çarçoveya lêpirsîna Gulistan Doku ku 6 sal in hatiye windakirin de, derbarê 2 kesên din de biryara binçavkirin hat dayîn. Heta niha Waliyê Dêrsimê yê wê demê Tuncay Sonel jî di nav de 11 kes hatine girtin.
Di dosyaya lêpirsîna xwendekara pola 2yemîn a Beşa Pêşveçûna Zarokan a Zanîngeha Munzurê Gulistan Doku ku ev 6 sal in aqûbeta wê nayê zanîn de, geşedanên nû berdewam dikin.
Xebatkarên nexweşxaneyê hatin binçavkirin
Di çarçoveya lêpirsînê de, derbarê 2 kesên din de biryara binçavkirinê hate dayîn. Li gorî agahiyan, xebatkarên beşa tomarkirina qeydan yên Nexweşxaneya Dewletê ya Dêrsimê Burçîn Yerlîkaya û Yucel Erdem hatin binçavkirin.
Heta niha 11 kes hatine girtin
Di çarçoveya pêvajoya nû ya dozê biryara binçavkirina 15 kesan hatibû dayîn. Di encama lêpirsînê de, 11 kesên ku Waliyê Dêrsimê yê wê demê Tuncay Sonel jî di nav de bû hatin girtin û şandin girtîgehê. 3 kes jî bi biryara kontrola edlî serbest hatin berdan.
Her wiha hate ragihandin ku ji bo gumanbar Umut Altaş ê ku li Dewletên Yekbûyî yên Amerîkayê (DYA) ye jî, bultena sor hatiye derxistin.
