Amed – Nûnerên saziyên demokratîk têkildarî kampanyaya “Ji Rojava re satatu, ji bo gelan azadî” diyar kirin ku li Rojava bingeheke xwerêvebirinê hatiye avakirin û gotin: “Modela Rojava bûye nasnameya mirovahiyê. Divê tavilê êrişên li ser Rojava bên sekinandin. Divê gelê Kurdistanê li dora Şoreşa Rojava bibe xelek û statuya Rojava were naskirin.”
Êrişên dewleta Tirk û komên paramîlîter ên girêdayê wê yên li ser Rojavayê Kurdistanê didomin. Dewleta Tirk û komên paramîlîter her roj bi SÎHAyan, top û bombeyan êrişî çalakvanên sivîl ên li Bendeva Tişrînê dike. Di êrişên li ser Bendava Tişrînê de ji 8ê Çile ve rojnameger, hunermend, jin, zarok, ciwan û kal û pîr jî di nav de heta 27 kes hatine kuştin û nêzî 300 kesî jî birîndar bûn e. Ji bo êrişên li ser Rojava bên sekinandin û satatuya Rojava were naskirin li Amedê 26ê Çile 419 partî û rêxistinên sivîl kampanyaya îmzeyan a “Ji Rojava re satatu, ji bo gelan azadî” dan destpêkirin.
Di çarçoveya kampanyayê de û bi daxwaza êrişên li ser Rojava bên sekinandin li Qada Şêx Sedî (Deriyê Çiyê) ya Amedê 28ê Çile li partiyên siyasî û rêxistinên sivîl ên demokratîk çalakiya rûniştinê li dar xistin û daxuyanî dan çapemeniyê. Nûnerên rêxistinên sivîl ku beşdarî çalakiyê bûn derbarê statuya Rojava de ji Ajansa Welat re axivîn.
‘Rojava ji cîhanê re mînak e’
Hevserokê Komeleya Lêkolînên Ziman û Çandên Mezopotmayayê (MED-DER) Remzî Azîzoglû da zanîn ku modela niha li Rojava bi rê ve tê birin ji bo cîhanê mînak e û got: “Li Rojava bingeheke xwerêvebirinê hatiye avakirin. Êrişên li ser Rojava jî nîşan dide ku naxwazin gelên Rojava xwe rêve bibe. Dixwazin vê yekê têk bibin. Niha li dijî van êrişan gelên Rojava xwedî li vîna xwe derdikeve û rêveberiya xwe diparêze. Em ê her tim piştgiriyê bidin gelên Rojava.”
Bakir: Dewlet ji statuya Rojava ditirse
Nivîskar Abdûrrahman Bakir diyar kir ku dewlet ji bo civak û mirovahiyê nexweşî ye û wiha axivî: “Divê her civak karibe xwe bi rêxistin bike û bi rê ve bibe. “Ji dîrokê heya niha dewletan tiştek nedaye civakan. Dewlet dixwaze bêtir desthilatiya xwe xurt bike û li ser civakê rûnê û civakê hewceyî xwe bike. Li Rojava civaka Kurd xwe bi hêz û rexistin kiriye û doza mafên xwe yên heyî dike û diparêze. Desthilatdar modela ku li Rojava hatiye avakirin ji bo xwe re xetere dibînin. Ji ber ku civakên wisa xwe bi rê ve dibin hewcedariya wan bi dewletê tune ye. Niha hewcedariya gelên Rojava bi dewletê tune ye û ji ber vê jî dewlet êrişî Rojava dike.”
‘Divê her kes li dora Şoreşa Rojava bibe xelek’
Ji endamên DEM Partiyê Ekrem Ay jî bi bîr xist ku bi salan e gelê Kurd li dijî faşîzm û dagirkeriyê li ber xwe dide û berxwedana xwe didomîne û wiha got: “Heya ku dewleta Tirk statuya gelê Kurd nas bike em ê her tim li qadan bin û li ber xwe bidin. Li Rojava jiyaneke hevpar û wekhevî pêk hatiye. Modela Rojava bûye nasnameya mirovahiyê. Divê êrişên li ser Rojava demildest bê sekinandin û çar aliyên Kurdistanê xwedî li Rojava derkeve û li dora Şoreşa Rojava bibin xelek û satatuya Rojava were naskirin. Bi taybetî jî divê Bakurê Kurdistanê bi rola xwe re rabe.”
‘Çareserî modela Rojava ye’
Reveberê Komeleya 78an a Amedê Huseyîn Bariş jî bi lêv kir ku di dîrokê de heya niha şer nebûye çare û ev sedsal in li ser vî welatî şer kêm nebûye. Huseyîn Bariş anî ziman ku Tirkiye dixwaze xeyalên împaratoriya Osmaniyan pêk bîne û got: “Dewlet polîtîkayên şer li ser Kurdistanê dide meşandin û encamên wê xerabtir bibin. Heke şer dijwar bibe dê li Rojhilata Navîn çareserî pêk neyê û qirkirin û komkujî pêk were. Çareserî xweseriya demokratîk e û xwebirêvebirina civakê ye.”
Huseyîn Bariş da zanîn ku li Rojava hemû gel bi reng û çanda xwe bi awayekî demokratîk dijîn û ev yek anî ziman: “Ji bo azadiya mirovahiyê gelên Rojava li ber xwe dide. Modela ku niha Rojava hatiye avakirin li tu derekî cîhanê nîn e. Kêm cih hebin jî lê di bin xizmeta emperyalîzmê de ne. Niha li Rojava êrişî jiyana azad û wekheviya gelan dikin. Xelasbûna Tirkiyeyê jî çareseriya demokratîk e û divê Tirkiye ji bo çareseriyê rêya demokratîk bide meşandin.”
Dayika Aştiyê: Bila Rojava azad bijî
Dayîka Aştiyê Meryem Tûra jî şerê li ser Rojava tê kirin şermezar kir û diyar kir ku dayîk êdî naxwazin şer çêbibe û aştiyê dixwazin. Meryem Tura wiha got: “Bila êdî sivîl, jin û zarokên Kurdan neyên kuştin. Em yekitiya gelê Kurd dixwazin û li her çar aliyên Kurdistanê bila êdî kes neyê kuştin. Hêsirên çavên dayîkan bila êdî neyên rijandin. Em şerê li ser Rojava naxwazin û bila gelên Rojava li ser axa xwe azad bijîn.”
‘Bila Rojava bibe xwedî statu’
Aktîvîsta TJAyê Cahîde Dalçîçek jî anî ziman ku divê hemû kes li ser welatê xwe azad bijî û got: “Dewlet ji aliyekî ve dibêje aştî lê ji aliyekî ve jî êrişî Rojava dike. Dewlet gelên ku aştiyê dixwazin bombebaran dike. Çiqasî êrişî Kurdan bikin jî Kurd jî ewqasî xurt dibin û li ber xwe didin. Em dixwazin Rojava bibe xwedî statu û êdî şer bisekine.”
