Wan – Parlementerê DEM Partiyê yê Bedlîsê Huseyîn Olan ku di daxuyaniya li ber Şaredariya Wanê de axivî, da zanîn ku biryara dadgehê ne tenê ji bo Abdullah Zeydan ji bo hemû gelên Wanê û gelê Kurd hatiye dayîn û got: “100 sal berê jî Kurdan ev yek qebûl nekir û niha jî qebûl nake.”
Çalakiyên têkildarî cezakirina Hevşaredarê Bajarê Mezin ê Wanê Abdullah Zeydan û hewldana qeyûm ya li ber Şaredariya Wanê di roja 3yemîn de didome. Li ber şaredariyê dirûşmên “Neslîhan Şedal rûmeta me ye”, “Abdullah Zeydan rûmeta me ye” û “berxwedan jiyan e” hatin berzkirin. Hevşaredarên Bajarê Mezin ên Wanê Neslîhan Şedal û Abdullah Zeydan, Hevşaredarê Bajarê Mezin ê Amedê Dogan Hatûn, Hevserokê Yekitiya Şaredariyên Başûrrojhilatê Anatoliyayê (GABB) Siraç Çelîk, Hevşaredara Bajarê Mezin a Mêrdînê Devrîm Demîr, hevşaredarên navçeyên Wanê, parlementerên Partiya Wekhevî û Demokrasiyê ya Gelan (DEM Partî) û bi hezaran kes tev li daxuyaniyê bûn.
Ewilî Hevseroka DEM Partiyê ya Wanê Gulşen Kûrt axivî û da zanîn ku wan bi kedeke mezin şaredarî bi dest xistiye. Gulşen Kûrt, anî ziman ku polîtîkayên qeyûm ne tenê meseleya gelê Kurd, meseleya hemû kesên hiqûqnas û mafparêzan e.
‘Gelê Wanê di hilbijartinê de biryara xwe daye’
Dû re Hevşaredara Bajarê Mezin a Mêrdînê Devrîm Demîr ku qeyûm tayînî şûna wan hatiye kirin, diyar kir ku gelê Wanê bi berxwedana xwe hêviya hemû gelên Kurdistanê ne û ev tişt got: “We di qirîza mazbatayê de berxwedaneke gelekî mezin kir, lewma hemû gelên Kurdistanê û hevşaredarên we ji we razî ne. Êdî bila bi lîstikên qirêj li ser vîna gelê me nelîzin. Gelê Wanê di hilbijartinan de biryara xwe bi awayekî zelal nîşan da. Gelê Wanê ji we nerazî ne, we naxwazin. Gelê Wanê hevşaredarên xwe hilbijartine û niha jî xwedî li wan derdikevin.”
‘Xwedî li peyama Ocalan derbikevin’
Parlementerê DEM Partiyê yê Bedlîsê Huseyîn Olan jî gelê Wanê ji ber berxwedaniya wan pîroz kir. Huseyîn Olan, got ku gelê Wanê di hilbijartinên 31ê adarê de 14 şaredariyên xwe bi dest xistin û diyar kir ku niha jî dixwazin şaredariya bajarê mezin ji destê wan derbixînin. Huseyîn Olan, da zanîn ku 100 sal berê di Serhildana Şêx Seîd de, li Koçgirî, Dêrsîm, Agirî çi dagirkerî hatibe kirin, niha jî heman dagirkerî tê kirin û wiha pê de çû: “100 sal berê jî Kurdan ev yek qebûl nekir û niha jî qebûl nake. Biryar tenê ji bo Abdullah Zeydan de nehatiye dayîn, ji bo hemû Wanê û gelê Kurd hatihe dayîn. Kurd êdî Kurdê berê nîne, îro hişyar û polîtîk e. Wê rojên pêşiya me Birêz Abdullah Ocalan dê peyamekê bide. Ev peyam peyama hevrejiyanê ye û xwedî li vê peyamê derbikevin.”
Daxuyanî bi çepikan bi dawî bû.
Dê êvarê jî bi tevlibûna Koma Aryen “Şahiya Ciwanan” bê lidarxistin.
