Şandeya CHPê ya ku ji Serokwekilê Koma CHPê Alî Mahîr Başarir û çend parlementeran pêk tê, serdana DEM Partiyê ya Wanê kir û peyama piştgiriyê dan.
Şandeya Partiya Gel a Komarê (CHP) ku ji Serokwekîlê Komê yê Meclîsê Alî Mahîr Başarir, parlementerê Amedê Sezgîn Tanrikûlû, parlementerê Stenbolê Yûnûs Emre, parlementera Hatayê Nermîn Yildirim Kara û parlementerê Rihayê Mahmût Tanal pêk tê, serdana Partiya Wekhevî û Demokrasiyê ya Gelan (DEM Partî) ya Wanê kir. Şande ji hêla Hevşaredarê Bajarê Mezin ê Wanê Abdullah Zeydan, parlementera DEM Partiyê ya Şirnexê Nevroz Ûysal Aslan û hevserokên DEM Partiyê yên Wanê Gulşen Kurt û Veysî Dîlekçî ve hatin pêşwazî kirin.
‘Gelên Tikriyeyê vê yekê qebûl nake’
Piştî serdanê, şandeya CHPê û nûnerên DEM Partiyê li pêş avahiya DEM Partiyê daxuyaniyek dan. Di daxuyaniyê de ewilî hevserokê DEM Partiyê Veysî Dîlekçî axivî û xêr hatina şandeyê kir. Veysî Dîlekçî, anî ziman ku li Tirkiyeyê bêhiqûqî berdewam dike û makezagon ji holê rakirine. Veysî Dîlekçî, destnîşan kir ku bi destê darazê vîna gel tê desteserkirin û got: “Gelê Wanê di hilbijartinê de helwesteke zelal nîşan da, lê îro careke din bi destê darazê vîna me hat desteserkirin. Ev yek hişmendiya desthilatê ku dixwaze demokrasî û hiqûqê ji holê rake nîşan dide. Lê gelên li Tirkiyeyê vê yekê qebûl nake.”
‘Em ê parastina aştiyê bidomînin’
Dûre Hevşaredar Abdullah Zeydan xêrhatina şandeya CHPê kir û got: “Hilbijartin hêmana herî girîng a demokrasiyê ye û diyar kir ku desthilat vîna gelê Wanê qebûl nake. Siyasetmedarên HDPê bi destê daraza ku girêdayî desthilatê ne tên cezakirin. Ev biryarên tên dayîn siyasî ne. Ev cezayê niha jî ku li min hatiye birîn dijhiqûqî ye û ji bo qeyûm hincet e. Lê em ê li dijî van êrîşan parastina aştiyê bidomînin û em ê van rojan bi hevûdûre piştgiriyê derbas bikin.”
‘Ev yek pirsgirêka hemû gelê Tirkiyeyê ye’
Serokwekîlê Koma CHPê Alî Mahîr Başarir jî bal kişand ser hilbijartinan û diyar kir ku gelê Wanê walî nehilbijartiye, gelê Wanê hevşaredarên xwe hilbijarti ne. Alî Mahîr Başarir, destnîşan kir ku ew polîtîkayên qeyûman qebûl nakin û wiha got: “Em dixwazin hiqûq û makezagona Tirkiyeyê bê pêkanîn. Lê, mixabin madeyên makezagonê yên ji 1ê heta 10an ku madeyên mafên bingehîn in, ji holê hatiye rakirin. Çend kesên li Enqere û Stenbolê derheqê hemû Tirkiyeyê de biryaran didin. Hêrsa serokkomar ya windakirina şaredariyan pere ye. Ji xwe yekane derdê wan pere ne. Em ji bo bertek nîşanî polîtîkayên qeyûm bidin li vir in û em teslîmiyetê qebûl nakin. Ev yek ne tenê pirsgirêka Wanê ye, ya hemû gelê Tirkiyeyê ye. Heke îro em bitirsin û serî bitewînin, wê serê sibê di saet 07.00an de deriyê me jî bê lêdan. Em gelê Wanê tenê nahêlin.”
Parlenterên din ên CHPê jî çend axaftin kirin û daxuyanî bi dawî bû.
