Hevberdevkê Komîsyona Ziman, Çand û Hunerê ya DEM Partiyê Heval Dilbihar ku di 1emîn Kongreya Asayî ya KURDÎGEHê de axivî, bal kişand ser banga Rêberê PKKê Abdullah Ocalan û got: “Di dîroka têkoşîna azadiyê de pêvajoyeke nû dest pê kir.” Hevseroka DBPê ya Wanê Gonul Ûzûnay anî ziman ku Rêberê PKKê Abdullah Ocalan banga dîrokî kir û ew li pey vê bangê ne.
Komeleya Pêşvebirina Çand û Zimanê Kurdî (KURDÎGEH) 1emîn Kongreya Xwe Ya Asayî li avahiya xwe ya Taxa Serhedê ya Wanê li dar xist. Eywana ku kongre lê hat lidarxistin, pankarta “Her dem Kurdî, her der Kurdî” hat daliqandin û eywan bi pankartanên kurdî û kulîlkên saziyan ku ji bo pîrozbahiyê şandine, hatin xemilandin. Partiyên siyasî, komeleyên demokratîk ên bajêr, saziyên sivîl û gelek welatî tev li kongreyê bûn. Kongre ji bo kesên ku di têkoşîna azadiyê de jiyana xwe ji dest dan, bi deqeyeke rêzgirtinê dest pê kir.
‘Em li gel Abdullah Ocalan in’
Di kongreyê de ewilî dîwan hat hilbijartin û dû re jî axaftin hatin kirin. Ewilî Hevberdevkê Komîsyona Ziman, Çand û Hunerê ya DEM Partiyê Heval Dilbihar axivî û kongreya KURDÎGEHê pîroz kir. Heval Dilbihar, bal kişand daxuyaniya duh ji aliyê Rêberê PKKê Abdullah Ocalan ve hatiye dayîn û got: “Di dîroka têkoşîna azadiyê de pêvajoyeke nû dest pê kir. Ger em çarçoveya daxuyaniyê yên dîrokî, felsefî, neteweyî û gerdûnî bixwînin, em ê bibînin ku ji bo têkoşîna azadiyê ya gelê Kurd û gelên Rojhilata Navîn pêvajoyeke nû dest pê kiriye. Em ji vir careke din dibêjin: Em heta dawiyê li gel birêz Ocalan, stratejî û gotinên wî ne. Birêz Ocalan bi zelalî behsa azadiya hemû nasname, hemû bawerî û çandan kir.”
‘Pirsgirêka sereke tevî zanînê jî neaxivtina Kurdî ye’
Li ser navê Komîsyona Kongreyê ya KURDÎGEHê Sabriye Kanat diyar kir ku pirsgirêka sereke nezanîna Kurdî û tevî ku zanîna Kurdî jî neaxivtine û wiha got: “Ev ne tenê berpirsyariya saziyekê ye, ger civakek zimanê xwe hebe divê wî zimanî zindî bihêle. Dîroka me û têkoşîna me bi hezaran bedelan didome. Divê em destpêkê ji malên xwe dest bi zindîkirina zimanê kurdî bikin. Me rê li ber axaftina Kurdî ya di malan de girtibû, dîsa em divê rê li ber vekin.”
‘Kurdî hebûna gelê Kurd e’
Hevseroka Partiya Herêmên Demokratîk (DBP) ya Wanê Gonûl Ûzûnay jî di kongreyê de axivî û diyar kir ku zimanê dayikê ji bo her civakê girîng e û got: “Duh em hemû bûn şahidê rojeke dîrokî. Birêz Ocalan banga aştiyê kir û diyar kir ku her kesên li van xakan dijîn û hemû gelan ev sedsalan in hesreta aştî, wekhevî û biratiyê heye. Di vê bangê de erk û wezîfeya me ew e ku bi meşandina siyaseteke demokratîk xwedî derketina saziyên xwe ye.”
Rêveberiya nû diyar bû
Piştî axaftinan rêveberiya nû hat hilbijartin. Di rêveberiya nû de ji bo hevserokatiyê Arîfe Arslan û Mesût Kertîş, ji bo endamên esil Yavûz Erçakan, Îslam Varhan û Evîndar Akbûlût û ji bo endamên venêrînê yên esil jî Çetîn Ergîn, Zekî Mamûk, Nasrî Sûnkûr hatin hilbijartin. Ji bo endamên esil ên yedek Arzû Kûtlûk, Gokhan Işik, Ozdemîr Ornek, Alî Ataman, Bîrhat Dûman û ji bo endamên venêrînê yên yedek jî Saît Beyaz û Mehdî Gerçeklî hatin hilbijartin.
