Wan – Hevserokên KURDÎGEHê ku nû hatin hilbijartin, behsa nexşerêya xwe kirin û wiha gotin: “Nexşerêya wan ya herî mezin û pîroz peyama Rêberê PKKê Abdullah Ocalan ne û wê jiyaneke nû bi peyama Ocalan pêşbikeve.”
Komeleya Pêşvebirina Çand û Zimanê Kurdî (KURDÎGEH) 1emîn Kongreya Xwe Ya Asayî li dar xist û rêveberiya xwe ya nû hilbijart. Li gorî lîsteya fermî ji bo hevserokatiyê Arîfe Arslan û Mesût Kertîş, ji bo endamên esil Yavûz Erçakan, Îslam Varhan û Evîndar Akbûlût û ji bo endamên venêrînê yên esil jî Çetîn Ergîn, Zekî Mamûk, Nasrî Sûnkûr hatin hilbijartin. Ji bo endamên esil ên yedek Arzû Kûtlûk, Gokhan Işik, Ozdemîr Ornek, Alî Ataman, Bîrhat Dûman û ji bo endamên venêrînê yên yedek jî Saît Beyaz û Mehdî Gerçeklî hatin hilbijartin.
Hevserokên nû yên KURDÎGEHê Arîfe Arslan û Mesût Kertîş xwestekên xwe yên ji bo zimanê Kurdî ji bo ajansa me (AW) vegotin.
Ewilî hevserok Arîfe Arslan, diyar kir ku perwerdehiya wan ev demeke didome û rêk û pêk in. Arîfe Arslan, anî ziman ku ew dê bi hêztir û xurttir perwerdehiya Kurdî bidin û got: “Em dixwazin hişmendiyeke zimanê Kurdî di nava civakê de ava bikin. Polên me yên perwerdehiyê berdewam in, kê bixwaze dikare serî lê bide. Em weke rêveberiya nû dê erka xwe bi cih bînin û kesên em ji bo vê peywirê layiq dîtî jî spasiyên xwe pêşkêş dikin. Zimanê Kurdî zimanê perwerdehiyê nîne û ev yek astengiyek e. Ji ber vê yekê paşveçûnek heye di aliyê ziman de. Heke ev astengî ji holê rabe û perwerdehî bi zimanê Kurdî bê dayîn dê çêtir be û xurttir be.”
‘Zimanê Kurdî jî weke hemû zimanên cîhanê pîroz e’
Hevserok Mesût Kertîş, binê wê xêz kir ku nexşerêya wan ya herî mezin û pîroz peyama Rêberê PKKê Abdullah Ocalan ne. Mesût Kertîş, diyar kir ku wê jiyaneke nû bi peyama Ocalan pêşbikeve û ev tişt anî ziman: “Armanca me ya herî mezin ew e ku zimanê Kurdî di nava jiyan, danûsitandinê, bazarê, perwerdehiyê de bikin sereke. Li gorî dîrok û nûveyan jî diyar e ku zimanê Kurdî jî weke hemû zimanên cîhanê pîroz e. Heta zimanê Kurdî dibe zimanê fermî û yê perwerdehiyê em ê xebatên xwe bidomînin û sûk, kolan, tax wê her der bibe dibistanên zimanê Kurdî.”
‘Divê dibistanên Kurdî bên vekirin’
Mesût Kertîş, da zanîn ku niha aştî û pêvajo tên nîqaşkirin û destnîşan kir ku aliyek ji xwe û tevgera xwe bibawer e û banga siyaseta demokratîk dikin. Mesût Kertîş, bi lêv kir ku li pêşiya siyaseta demokratîk çi astengî hebin divê bên rakirin û wiha dawî kir: “Dibêjin bila zimanê Kurdî li dibistanan bibe zimanekê hilbijartî. Zimanê Kurdî ku zimanê nêzî 40 milyon Kurdan e, ne layiqî wê ye ku bibe zimanê hilbijartinê. Ev ziman zimanekî mecbûrî û fermî ye. Divê ji bo zimanê Kurdî dibistan bên vekirin. Lê mixabin gava peyama aştiyê dihat xwendin, gelek televîzyonan weşana xwe qût kirin. Pêwîste êdî dest ji pêkanînên wiha berdin. Heke bi rastî jî jiyaneke wekhev bê axaftin çawa Tirkî zimanê fermî û yê perwerdehiyê ye, pêwîste ku Kurdî jî xwedî heman mafan be.”
