MKGê bi wesîleya 8ê Adarê daxuyaniyek nivîskî belav kir û diyar kir ku îro 10 jinên rojnameger li girtîgehan 8ê Adarê pêşwazî dikin û got ku civaka azad bêyî çapemeniya azad ne pêkan e.
Komeleya Rojnamegerên Jin a Mezoptamyayê (MKG) bi wesîleya 8ê Adarê Roja Jinan a Cîhanê daxuyaniyek nivîskî weşand û 8ê Adarê li hemû jinên rojnameger pîroz kir.
Daxuyaniya MKGê a bi sernavê “Çapemeniya Azad, Jina Azad!” bi vî rengî ye:
“Em îro 8ê Adarê Roja Jinên Cîhanê ku sembola têkoşîna wekhevî, azadî û edaletê ya jinên cîhanê ye, silav dikin. Li ser axa qedîm a Mezopotamyayê jinan bi têkoşîna xwe ya dîrokî civak veguheriye û bûye dengê berxwedan û hêviyê.
Em weke Komeleya Rojnamegerên Jin a Mezopotamyayê li dijî zext, sansur, tundî û cudakariya li ser jinên rojnameger têdikoşin û têkoşîna xwe didomînin. Em bi pênûs, kamera û dengê xwe heqîqetê dişopînin. Bi vê re em ê mafê jiyanê, ked, berxwedan û daxwazên jinan bidin ber çavan.
Rojnameger dema karê xwe dikin gef li wan tên xwarin, bi sansurê rû bi rû dimînin, bêkar tên hiştin û şîdetê dibînin. Lêbelê, em dizanin ku rastî bêdeng namîne! Weke rojnameger tevî zextan jî em ê bi hev re bi hêz bibin, piştgiriyê bidin hev û rastiyan bibêjin.
Îro 10 hevalên me yên rojnameger ji ber rastiyên ku nivîsandine di girtîgehê de ne. Lêbelê, em dizanin ew ê nikaribin rastiyê dîl bigirin! Dengê wan dengê me ye. Em ê hem li hundir hem jî li derve bi hevgirtinê xurt bibin û rastiyan bibêjin.
Civaka azad bêyî çapemeniya azad ne pêkan e!
Di 8ê Adarê de em bang li hemû jinan dikin ku hevgirtinê mezin bikin û bibin dengê rojnamegeran. Em ê bi hev re têkoşîna xwe ya ji bo cîhanek wekhev û azad bidomînin!
Bijî têkoşîna jinan! Bijî çapemeniya azad!”
