Jinên ku tev li mîtinga 8ê Adarê bûn peyama Rêberê Gelê Kurd Abdullah Ocalan nirxandin û gotin: “Em peyama Birêz Ocalan bi rêzdarî silav kikin. Ji bo ku ew peyam bi cih bê em ê li her qadê têkoşîna xwe didomînin û jiyanê xweştir bikin.”
Tevgera Jinên Azad (TJA) bi boneya 8ê Adarê Roja Jinan a Cîhanê li Qada Îstasyonê ya Amedê bi dirûşma “Raperîna me li dijî qirkina jinan e, meşa me ber bi azadiyê ve ye” mîtîng li darxistin. Bi hezaran jin li pêşiya AZC Plazayê kom bûn û heta qada mitîngê ya Îstasyonê meşiyan. Jinan pankartên “Jin jiyan azadî”, “Em vîna ji pola silav dikin civaka demokratîk ava dikin”, “Li hemberî qirkirina jinan em ê serî rakin, em ê azadiyê ava bikin”, “Sedsala jinê wê bibe şoreşa zimanê Kurdî” rakirin û bi berzkirina dirûşmeya “Jin jiyan azadî” meşiyan qadê. Jinan bi dirûşmên ku berz kirin xwestin Rêberê Gelê Kurd Abdullah Ocalan azad bibe.
Jinên kurd hertim pêşeng bûne
Jinên ku tevî mîtîngê bûn li ser 8ê Adarê Roja Jinan a Cihanê û banga Rêberê Gelê Kurd Abdullah Ocalan ji Ajansa Welat (AW) re axivîn. Jinan da zanîn ku 8ê Adarê bi berdêlên gelek giran hatiye bidestxistin û wiha gotin: “Jin ji bo ku aştî pêk were kedeke mezin didin. Lê tundiya li ser jinan jî berdewam dike. Em hişmendiya zilamtiyê û qirkirina jinan şermezar dikin. Jinên kurd her tim di her qadê de pêşeng bûne, ji bo ku aşti jî pêk were ez bawer im dê pêşengtiyê bikin.”
