Mardîn 1969 Spor û Mûşspor di lîstika fînalê ya Play-Offê ya Grûba Sor a Lîga 2yemîn de hatin hemberî hev. Mardîn 1969 Spor bi 2-1 Mûşsporê têk bir û derbasî Lîga 1emîn bû.
Mardin 1969 Spor û Mûşspor ji bo derketina Lîga 1emîn li Stada Tahîr Elçî ya Amedê di lîstika fînalê ya Play-Offê ya Grûba Sor Lîga 2yemîn de hatin hemberî hev. Bi hezaran alîgirên Mardîn 1969 Spor û Mûşsporê li trîbunan cihê xwe girtin. Alîgirên Mardîn 1969 Spor li trîbunên rojava û bakur (pişt kaleya bakur) cihê xwe girtin û alîgirên Mûşsporê jî li trîbunên rojhilat û başûr (pişt kaleya başûr) cih girtin.
Gelek siyasetmedar û kesayet li maçê temaşe kirin
Tevî bi hezaran alîgiran, Hevşaredarê Mêrdînê Ahmet Turk ku qeyim tayînî şûna wî hatiye kirin, parlamenterê DEM Partiyê yê Agiriyê Sirri Sakik, parlamenterên DEM Partî û CHPê, Hevşaredara Bajarê Mezin a Amedê Serra Bucak, rêveberên kluba her du tîman, rêveberên Amedsporê û gelek siyasetmedar û nûnerên rêxistinên sivîl jî li protokolê cihê xwe girtin û li maçê temaşe kirin.
Di beşa ewil a maçê de futbolîzê Mardîn 1969 Spor Mertan Ozturk di deqîqeya 24an de gol avêt Mûşsporê û beşa ewil bi skora 1-0 qediya.
Beşa duyemîn bi kelecanek mezin a alîgiran dest pê kir. Di deqîqeya 61an de futbolîzê Mardîn 1969 Sporê Mîraç Acer gola duyemîn avêt û skor bû 2-0. Di vê kêliyê de kêfxweşî û kelecaniya alîgirên Mardîn 1969 Spor derket asta herî jor.
Mardîn 1969 Spor derbasî Lîga 1emîn bû
Tîma Mûşsporê ket nava bizavek mezin û hewl da golek biavêje. Di deqîqeya 73yan de futbolîzê Mûşsporê Bîlal Budak golek avêt û bi vê golê skor bû 2-1. Mûşsporê piştî gola ewil hewl da ku skorê bike wekhev lê dîsa jî hewldana wê negihîşt armancê. Tevî ku beşa duyemîn 90+6 deqîqe hate lîstin jî Mûşspor bi ser neket û Mardîn 1969 Spor bi skora 2-1 bi ser ket û derbasî Lîga 1emîn a Federasyona Futbolê ya Tirkiyeyê (TFF) bû.
Bi serkeftina Mardîn 1969 Sporê re coş û kêfxweşiya alîgirên tîmê derket asta herî bilind û tîma xwe pîroz kirin.
Kupayê wergirtin
Piştî maçê li sehayê merasîma kupawergirtinê hate lidarxistin. Futbolîzên Mardîn 1969 Sporê bi kêfxweşiyek di asta jor de kupaya xwe wergirtin û şanazî û serkeftina xwe nîşan dan.
