DEM Partî û DBP bi wesîleya Cejna Remezanê serdana gora siyasetmedarê Kurd Vedat Aydin kirin.
Vedat Aydin di sala 1991an de bû Serokê HEPê ya Amedê. Di 5ê Tîrmeha 1991an de bi hinceta “îfade bide” aliyê JÎTEMê ve hat binçavkirin û revandin. Di 7ê Tîrmehê de cenazeyê wî li ser rêya navçeya Madenê hat dîtin. Her cejn siyasetmedar û malbat bi girseyî serdana gora Vedat Aydin dikin.
Parlamenterên DEM Partiyê yên Amedê Helîde Turkoglu û Adalet Kaya, Hevşaredarên Amedê Serra Bucak û Dogan Hatûn,
Hevserokên DEM Partî û DBPê yên Amedê, endam û rêveberên DEM Partî û DBPê û nûnerên saziyan û malbata Aydin serdana gora Vedat Aydin a li Goristana Deriyê Mêrdînê kirin.
Berî axaftinan fatîha li ser gorê hat xwendin û rêz hat girtin.
‘Divê berpirsiyar bên darizandin’
Ewilî hevjîna Vedat Aydin, Şukran Aydin axivî û diyar kir ku divê êdî rijandina xwînê were sekinandin û wiha axivî: “Li ser navê malbeta Aydin cejna we pîroz dikim. Gelê Kurd gelek ked da, îro pêvajo dest pê kiriye, daxwaza me azadî ye. Em dixwazin pêvajo bi ser bikeve. Ji bo vê jî divê em yekitiya Kurdan ava bikin. Bi hezaran mirovên ku hatin revandin û kuştin hene. Kujerên wan nehatin darizandin. Kujer eşkere ne lê nayên darizandin. Pêwîst e berpirsiyar bên darizandin û desthilat bibêje me van komkujiyan kiriye.”
‘Wê hevalên me tim di bîra me de bin’
Hevşaredar Serra Bucak jî da zanîn ku têkoşîna gelê Kurd berdewam dike û wiha got: “Ev 40 sal in em di nav têkoşîna azadiyê de ne. Gelek hevalên me canê xwe dan. Ev hevalên me her dem di bîra me de ne. Di şexsê Vedat Aydin de em hemû cangoriyan bibîr tînin. Em ê li ser şopa wan bin.”
‘Gelê Kurd wê bi ser bikeve’
Paşê Berdevka Meclisa Jinan a DEM Partiyê Halîde Turkoglu axivî û wiha got: “Di şexsê Vedat Aydin de êrişên giran li dijî Kurdan dest pê kirin. Bi hezaran Kurd hatin windakirin. Lê çi dikin bila bikin wê gelê Kurd bi ser bikeve. Îro em ber bi azadiyê ve dimeşîn. Ev meş bi keda wan hevalan dimeşe. Em hemû şehîdên azadiyê bi bîr tînin.”
‘Sed sal in têkoşîna me didome’
Di dawîyê de Hevseroka DEM Partiyê ya Amedê Gulşen Ozer axivî û anî ziman ku pêwîst e yekitiya gelê Kurd ava bibe û got: “Îro em bi saya şehîdên xwe li ser pêya ne. Em her sal tên vê derê û tevahiya şehîdan bi bîr tînin. Ev sed sal in Kurd di nav têkoşînê de ne. Ji ber vê yekê êriş li ser gelê Kurd hene. Lê em ê heta dawiyê li pey şopa şehîdên xwe bin. Divê em bibin yek, 27ê Sibatê bangek dîrokî hat, ev bang jiyanek azad wê bîne nav gelê Kurd.”
Piştre beşdaran qerenfîl danî ser gorê û bîranîn bi dawî bû.
