8emîn Pêşengeha Pirtûkan a Amedê di roja nehemîn de bi dawî bû. Tevî hemû zexta polîsan û desteserkirina pirtûkan jî bi deh hezaran kes beşdarî pêşengehê bûn.
Bi pêşengiya Odeya Bazirganî û Pîşesaziyê ya Amedê (DTSO) û TUYAPê, 8emîn Pêşengeha Pirtûkan a Amedê hat lidarxistin. Pêşengeh li Navenda Pêşengehê ya Navneteweyî ya Mezopotamya ya Amedê pêk hat. Pêşengehê roja 30yê Mijdarê dest pê kir û îro 8ê Kanûnê bi dawî bû.
31 weşanxaneyên Kurd jî di nav de bi giştî 216 weşanxane beşdarî pêşengehê bûn. Di van 9 rojên pêşengehê de bi sedan nivîskar hatin standên weşanxaneyan û pirtûkên xwe ji bo xwîneran îmze kirin. Li salonên Dîcle û Firatê yên pêşengehê gelek panel, gotûbêj û şahî jî hatin lidarxistin.
Bi sed hezaran kes hatin pêşengehê
Li gorî X-raya di van neh rojan de 215 hezar û 4 kes hatine pêşengehê û derketine. Her çiqas li pêşengehê dîmenên desteserkirina pirtûkan derketin holê jî lê belê xelkê ango xwîneran guh neda vê yekê û hatin pêşengehê. Her wiha ji gelek bajarên herêmê xwîner hatin pêşengehê.
Beşdarî baş bû lê giraniyê pişta xelkê şikandiye
Her çiqas beşdariya xwîneran bo pêşengehê baş bû jî lê li gorî weşanxaneyan û nivîskaran li gorî pêşengehên salên berê beşdarî qels bûye. Lê tevî ku polîsan sê çar rojan bi ser standa Weşanxaneya Aramê û standa Pirtûka Kurdî de girtin û pirtûkan desteserkirin jî lê dîsa xwîner hatin pêşengehê û xwedî li weşanxaneyan derketin. Her wiha weşangeran û nivîskaran diyar kir ku îsal ji ber krîza aborî ku giraniyê bi xwe re aniye kes wek salên berê nikaribûn pirtûkan bistînin.
Qelebalixiya roja dawî
Rojên dawiya hefteyê pirr qelebalixî hebû û bi deh hezaran kes hatin pêşengehê û li ser standan geriyan. Ji zarokan bigire heta kal û pîran welatî hatin pêşengehê. Ji ber ku îro roja dawî bû, pirr qelebalixî hebû û cih li ber standan nemabû.
50 saliya nivîskariya Berken Bereh
Îsal nivîskarê rûmetê yê pêşengehê nebû. 50 saliya nivîskariya helbestvanê Kurd Berken Bereh hat pîrozkirin û di şahiya pîrozbahiya nivîskariya Bereh de dîmenên xweşik derketin holê.
Ma Musicê ji bo lansmana pirtûka “Repertuara Stranbêjiyê” bi beşdariya şagirtên xwe û malbatên wan li pêşengehê şahiyek li dar xist û şanaziyek derket holê. Her wiha hema bêje her roj xebatkarên Ma Musicê li nav pêşengehê geriyan û hem li erbanê dan hem jî ji bo beşdar û weşangeran strîn.
