Şîna ji bo Sirri Sureyya Onder a li Rêxistina DEM Partiyê ya Amedê di roja duyemîn de berdewam dike. Hevşaredarê Amedê Dogan Hatun got ku ala têkoşînê ya Sirri Sureyya Onder ji wan re hiştiye dê bilind bikin.
Şîna ji bo Endamê Şandeya DEM Partiyê ya Îmraliyê û Serokwekîlê Meclisê Sirri Sureyya Onder a li avahiya Rêxistina DEM Partiyê ya Amedê di roja duyemîn de berdewam dike. Şîn dê sibê jî bidome. Di şînê de endam û rêveberên DEM Partiyê, DBPê, Hevşaredarên Şaredariya Bajarê Mezin a Amedê Serra Bucak û Dogan Hatun, nûnerên rêxistinên sivîl, Dayikên Aştiyê û gelek welatî amade bûn.
Li cihê şînê ji bo Sirri Sureyya Onder qûran û fatîha hat xwendin. Paşê Hevşaredarên Amedê Serra Bucak û Dogan Hatun axivîn.
‘Em ê ala têkoşîna wî bilind bikin’
Dogan Hatun di şînê de ewilî axivî û diyar kir ku ala azadiyê tu carî nakeve xwarê û wiha got: “Kekê Sirri Sureyya Onder ji bo gelê me kesayetek gelek girîng bû. Lê bila gelê me xwe xemgîn neke. Em ê nehêlin ku ala têkoşîna wî tu carî bikeve xwarê. Em soz didin ku ev ala kekê Sirri Sureyya Onder anî vê astê em ê tim bilind bihêlin. Em hêvîdarin ku azadî pêk were û bila gelê me jî hêvîdar be.”
‘Gelek tiştên baş li pey xwe hişt’
Paşê jî Serra Bucak axivî û da zanîn ku dilê wan dişewite, ew pirr xemgîn in û wiha got: “Em dizanin dilê tevahiya gelê me dişewite. Lê tişta ku hevrê Sirri li pişt xwe hişt girîng e. Hevalê me Sirri gelek tiştên baş li pey xwe hişt û çû. Em soz didin ku heta şer bê rawestandin aştî were welatê me, em ê wekî Sirri Sureyya Onder têbikoşin.”
Gelek kes tên serdana şînê û dê heta sibê berdewam bike.
