PKKê di 27ê Mijdara 1978an de kongreya xwe ya yekemîn pêk anî û avabûna xwe îlan kir. Piştî 47 salan li ser banga Rêberê Gelê Kurd Abdullah Ocalan di 5-7ê Gulanê de 12emîn kongreya xwe pêk anî û dawî li hemû xebatên xwe anî. PKKê di 47 salan de mohra xwe li dîrokê xist.
Partiya Karkerên Kurdistan (PKK) bi kongreya xwe ya damezrandinê ya ku li gundê Fîs ê navçeya Licê ya Amedê lidar xistî, li Kurdistan û Rojhilata Navîn mohra xwe li nîvsedsalê xist. PKKê 12emîn Kongreya xwe ya Awarte li Herêmên Parastinê yên Medyayê lidar xist. Bi bandora atmosfera siyasî-civakî ya salên 1970î koma xwendekaran a bi pêşengiya Rêberê Gelê Kurd Abdullah Ocalan hatî ba hev, di 52 salên mayî de mohra xwe li Tirkiye û Rojhilata Navîn xist.
Di Newroza 1973yan de li Bendava Çûbûk a Enqereyê Rêberê Gelê Kurd Abdullah Ocalan bi komeke hevalên xwe re hate ba hev û teza “Kurdistan mêtingeh e” bi hevalên xwe re parve dike. Rêberê Gelê Kurd Abdullah Ocalan di nirxandinên xwe yên berê de wiha dibêje: “Me welatparêziya welatekî ku ti kes newêre navê wê jî bîne ziman, girt ser xwe.” PKKê di 47 salan de ji xeynî pêngavên siyasî, civakî û fikrî; amûrên ku hedefên mîna aştî, azadî û civaka demokratîk pêk tînin, timî guhertin-veguhertin hatin esasgirtin. Cihê ku guhertin-veguhertinên çêkerî, programatîk û rêxistinî yên navborî lê hatin pêkanîn jî kongre bûn.
Ji duh heta îro Kongreyên PKKê wiha ne:
Rêberê Gelê Kurd Abdullah Ocalan di 27ê Sibata 2025an de bi “Banga Aştî û Civaka Demokratîk” re pêvajoyeke nû ya guhertin û veguhertinê danî pêşiya tevgerê.
Kongreya 1emîn
PKKê di 27ê Mijdara 1978an de li gundê Fîs ê navçeya Lîcê ya Amedê kongreya xwe ya damezrandinê lidar xist. Kongreyên ku PKKê ji wê rojê heya niha pêk anîne û xisûsên esas ên wan kongreyan wiha ne:
Di kongreya ku 26-27ê Mijdara 1978an de bi pêşengiya Rêberê Gelê Kurd Abdullah Ocalan li gundê Fîs ê navçeya Lîcê ya Amedê hatî kirin de, damezrandina PKKê hate îlankirin. 22 kes beşdarî kongreyê bûn. Di kongreyê de bername, tuzuk û manîfestoya partiyê hate qebûlkirin. Abdullah Ocalan weke sekreterê giştî yê partiyê hate hilbijartin. Demek kurt piştî damezrandina PKKê, darbeya 12ê Îlona 1980’an pêk hat. Gelek kadroyên pêşeng û damezrîner ên partiyê, hatin girtin. Kadroyên pêşeng ên PKKê û berxwedana zindanê ya sempatîzanên wê darbeyeke mezin li darbekaran xist û hêza îradeya PKKê nîşan da.
Kongreya 2yemîn
Kongreya 2yemîn a PKKê, di 20-25ê Tebaxa 1982yan de li kampeke li ser sînorê Sûriye-Urdun a li Eniya Rizgariyê ya Gelê Fîlîstînê, bi tevlîbûna 65 delegeyan pêk hat. Biryara “rizgarbûna ji penaberbûnê, vegera li welat û dest bi têkoşîna gerîla kirin” di kongreyê de hate girtin.
Kongreya 3yemîn
3yemîn Kongreya PKKê jî di navbera 25-30ê Gulana 1986an de li Kampa Helvê a li Lubnanê hate lidarxistin. Di kongreya piştî Pêngava 15’ê Tebaxê hatî lidarxistin de biryara artêşbûnê hate standin û Artêşa Rizgariya Gelê Kurd (ARGK) hate îlankirin.
Kongreya 4emîn
4’emîn Kongreya PKKê jî di navbera 26-31ê Kanûna 1990an de li Heftenînê hate lidarxistin. Ji ber belavbûna ARGKê ya li Kurdistanê, ev kongre ji aliyê Rêber Apo ve weke ‘’Kongreya Gerîlayan’’ hate binavkirin. Piştî kongreyê ku di serdema hilweşîna sosyalîzma reel û Şerê Kendavê de hate lidarxistin, li Bakurê Kurdistanê şer giha astên herî bilind.
Kongreya 5emîn
5emîn Kongreya PKKê di navbera 8-27ê Çileya 1995an de li Heftenînê hate lidarxistin. Di kongreyê de li şûna sekreteriya giştî derbasî serokatiya giştî bûn û li gel guherîna ala Partiyê di warê îedolojîk û avaniya rêxistinî de jî guherîn çêbûn.
Kongreya 6emîn
Kongreya Şeşemîn jî di navbera 12ê Çile û 18ê Sibata 1999an de li Xinêrê hate lidarxistin. Kongreya 6emîn di serdema Komploya Navneteweyî ya li dijî Rêberê Gelê Kurd Abdullah Ocalan de hate lidarxistin.
Kongreya 7emin
Di 2-23yê Çileya 2000î de jî kongreya awarte hate lidarxistin. Kongre bi beşdarbûna 197 delegeyan li Qendîlê hate lidarxistin û piştî kongreyê yekem pêngavên têkildarî guherîna paradîgmayê hatin avêtin.
Kongreya 8emîn
Kongreya 8emîn bi beşdarbûna 285 delegeyan di navbera 4-10ê Nîsanê li Qendîlê hate lidarxistin. Kongre di serdema ku pirsgirêkên Partiyên navxweyî û hewlên tasfiyeker zêde bûbûn de, hate lidarxistin. Di kongreyê de her çend girêdayî parêznameya Rêberê Gelê Kurd Abdullah Ocalan ji Dewleta Rahîb a Sumeran Ber Bi Şaristaniya Demokratîk Ve hin guhertin hatibin kirin jî guherîneke mezin pêk nehat.
Kongreya 9emîn
Rêber Gelê Kurd Abdullah Ocalan li hemberî hin krîzên fikrî û îdeolojîk yên di nava Partiyê de yên piştî Kongreya 8emîn û piştî wê pêvajoya Jinûveavakirina PKKê da destpêkirin. 9emîn Kongreya PKKê bi beşdarbûna 205 delegeyan di navbera 28ê Adar- 4ê Nîsanê de li Xinêrê hate lidarxistin. Her çen di kongreyê de başbûnên rêxistinî yên mezin pêk hatibin jî asta dihat hêvîkirin nehate bidestxistin.
Kongreya 10emîn
10emîn Kongreya PKKê jî di navbera 21-30ê Tebaxa 2008an de li Qendîlê hate lidarxistin. Di kongreyê de mijara kûrbûna li ser paradîgmaya nû esas hate girtin.
Kongreya 11emîn
Kongreya 11emîn jî di serî de Sûriye û Iraq di serdema kûrbûna krîzên li Rojhilata Navîn û êrîşên çeteyên DAÎŞ’ê yên li seranserê Kurdistanê de hate lidarxistin. Kongre di 5-13ê Îlona 2023yan de bi beşdarbûna 125 delegeyan li Xinêrê hate lidarxistin. Di kongreyê de ji bo çareseriya pirsgirêka Kurd a li Tirkiyeyê gelek pêngavên weke îlana agirbestê û vekişîna gerîlayan a ji Bakurê Kurdistanê hatin avêtin. Di pêvajoya hevdîtinên çareseriyê de dewleta Tirk bi cîvîna xwe ya MGK’ê ya di 30’ê Cotmeha 2014’an de Plana Çalakiyên Têkbirinê qebûl kir û piştî demeke kurt pêk anî.
Kongreya 12emîn
12emîn Kongreya PKKê ya Awarte jî piştî 10 salên şerê dijwar, piştî banga Rêberê Gelê Kurd Abdullah Ocalan ya 27ê Sibatê ya ‘’Aşitî û Civaka Demokratîk’’ hate lidarxistin. Ji Kongreya 1’emîn ku weke ‘’Destwerdane radîkal a li hemberî dîrokê’’ hate lidarxistin heya roja me ya îroyîn di 47 salan de weke encama têkoşîna bêhempa polîtîkayên têkildarî înkar û tunekirina gelê Kurd bi piranî hatin têkbirin. PKKya ku mîsyona xwe ya dîrokî bi serkeftî bi cih anî, di Kongreya 12’emîn de ji bo pêkhatina Aşitî û Avakirina Civaka Demokratîk û destpêkeke nû biryarên dîrokî girtin. Di kongreyê de biryara ‘’ji bo pêvajoya pratîkbûnê ji aliyê Rêber APO ve bê meşandin û birêvebirin biryarên fesixkirina avahiya rêxistinî ya PKK’ê û bidawîkirina rêbaza têkoşîna çekdarî û xebatên li ser navê PKKê daye meşandin bi dawî kiriye’’ hate girtin.
