Amed – Berdevka PÎAyê Menîce Rumeysa Gulmez ku wek delege tev li civîna Înîsiyatîfa Yekitiya Demokratîk bû, diyar kir ku Kurd li hember çar dewletan têdikoşin û got: “Ji ber vê jî gere yekitiya wan xurt bibe.”
Nûnerên partiyên siyasî yên Kurdistanî, saziyên sivîl ên civakî, rûspî, oldar û bawermend, kesayet, parlamenter jî di nav de 301 delegeyên “Însiyatîfa Yekitiya Demokratîk” li Amedê di 10-11ê Gulanê de civîna xwe pêk anî. Piştre deklerasyona civînê bi daxuyaniya çapemeniyê ji raya giştî re parvekirin. Berdevka Partiya Însan û Azadiyê (PÎA) Menîce Rumeysa Gulmez ku wek delege tev li civîna Înîsiyatîfa Yekitiya Demokratîk bû, derheqê yekitiya Kurdan û kongreya PKKê de ji Ajansa Welat re axivî.
‘Ev însiyatîf di pêvajoyeke girîng de hat avakirin’
Menîce Gulmezê da zanîn ku ji bo însiyatîfê ava bikin, gelek danûstandin kirine, bi siyasetmedar, hunermend û rûspiyan re hevdîtin kirine û fikrên wan girtine û got: “Van xebatan 9 mehan berdewam kir. Di vê pêvajoyê de ku PKKê biryara çekberdanê girt, demeke nû destpêkiriyê ev însiyatîf dê cihekî girîng bigre. Êdî Dewleta Tirk an jî dewletên neyarên Kurdan nikarin bibêjin Kurd terorîst in, Kurd mirovan dikujin, êdî PKK jî tuneye. Heke ew jî samîmî bin dê êdî bibînin Kurd bi siyaseteke sivîl, bi însiyatîfên sivîl mafê xwe diparêzin. Ev însiyatîf jî di vê pêvajoyê de hate avakirin, pêvajoyeke girîng e.”
‘Yekîtî tune be hêz jî tune ye’
Menîce Gulmezê diyar kir ku êdî Kurd dizanin heke yekitiya wan tunebe hêza wan jî dê tunebe. Encax bi yekitiya Kurdan hêza Kurdan dikare xurtir bibe û wiha pê de çû: “Kurd li hember çar dewletan têkoşînê dimeşînin ji ber vê jî divê yekitiya wan xurt be. Niha li Rojava gelê Kurd yekitiya xwe avakir, êdî dora Bakur e. Her çar parçeyên Kurdistanê ku di nav xwe de yekitiyâ xwe avabike ev ê bibe sedemê yekitiya temamî Kurdan. Kesên ku tevî xebatên yekitiya Kurdan nebin tê wê wateyê ku samimiyeta wan ya têkoşîn û yekitiya Kurdan tuneye. Pêwist e her kes di vê pêvajoyê de samimî tevbigere û tevî xebatan bibe. Hewceya em mafê Kurd û Kurdistanê bidine pêşiya hemû tiştî, ji bo Kurdan û Kurdistanê yekitiyekî avabikin. Wek însiyatîf jî em ê li gel hemû Kurdan biaxivin û hewelbidin wan bikin nav însiyatîfê.”
‘Heke dewlet samîmî be gere gavan bavêje’
Menîce Rumeysa Gulmezê bilêv kir ku bi salan e dewlet PKKê dixe bahane û wiha dawî li axaftina xwe anî: “Bi salan e Dewleta Tirk digot PKK e teror e, halbukî gere bidîtana ku PKK toximê vê zilm û neheqiya ku li Kurdan hatiyê kirin e. Ev zilm û heqaret nebûya pêwist nedibû ku PKK jî derkeve holê. Birêz Abdullah Ocalan di encama nîqaşan, hevdîtinan de biryar da û PKKê jî kongreya xwe komkir û dawî li xebatên xwe anî. Piştî banga Birêz Abdullah Ocalan dewlet jî heke samîmî be gere ew jî hin gavan bavêje. Dewleta Tirk heke di mijara siyasetmedarên Kurd yên ku bi salan in girtîne, di mijar çand, ziman û hunera Kurdî de gavan bavêje ez dibêjim banga Birêz Abdullah Ocaln jî dê bigihêje armanca xwe. Wek gelê Kurd bîr û baweriyên me çi dibin bila bibin, dozên me, partiyên me çi dibin bila bibin, lê em mecbûrin di Kudayaetiyê de yekitiya xwe avabikin. Ji bo Kurdayetiyê destê xwe daynin bin berê. Li gel hev têkoşîneke demokratîk bikin. Em li gel hev bin em ê xurt bibin. Heta niha tu dewletekî nekaribûye Kurdan xelas bike. Kurd bibin yek tu carî jî xelas nabin.”
