Di civîna gel a li Amedê hat kidarxistin de peyama “PKKê barê herî zehmet da ser milê xwe. Ji niha pê ve edî ev bar li ser milê her ferdê civakê ye.”
Ji bo peyama Rêberê Gelê Kurd Abdullah Ocalan li her derê baş were fêmkirin bi pêşengiya Tevgera Jinên Azad (TJA) Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) li Parka Temayê ya navçeya Peyas a Amedê civîna gel hat lidarxistin. Rêxistina DEM Partiyê ya Amedê, Hevseroka Komeleya Hiqûqnasên Ji Bo Azadiyê (OHD) Ekîn Yeter, Hevşaredarê Peyasê Cengîz Dundar, endamên Meclisê yên Şaredariyê, endamên Komeleya Dayikên Aştiyê, endamên saziyên sivîl ên Amedê û ji derdorê jî gelek kes beşdarî civînê bûn. Civîn bi deqîqeyek rêzgirtina ji bo cangoriyan destpê kir. Piştî rêzgirtinê Hevseroka OHDê Ekîn Yeter perspektîf xwend.
Ekîn Yeter anî ziman ku avakirina Aştî û Civaka Demokratîk ji bo guhertina civakê ya herî baş e û wiha got: “Kongre ji bo herêmê û gelê kurd gelek girîng bû. PKK li dijî hemû neyîniyan barê herî zehmet da ser milê xwe. Ji niha pê ve edî ev bar li ser milê her ferdê civakê ye. Yanî ev berpirsyariya herkesî ye. Divê herkes birêxistin be û xwe bi rêxistin bike. Avakirina Aştî û Civaka Demokratîk ji bo guhertina civakê ya herî baş e. Pêvajo çawa bi dawî dibe bila bibe divê heta ku serkeftin were bidestxistin wê têkoşîn bidome.”
Divê pêvajo bi muzakereyan bê çareserkirin
Ekîn Yeter got ku modela li rojavayê Kurdistanê pêk tê dê ev model ji bo hemû Rojhilata Navîn derbasdar be û wiha axivî: “Pêdiviya me pê heye ku em pêvajoyê ber bi riyên çareseriyê ve bibin. Wekî ku tê zanîn niha li Îranê jî şer hatiye destpêkirin, lê ev şerê heyî ji bo gelê kurd û Rojhilata Navîn firsendek e. Modela ku Birêz Ocalan li rojavayê Kurdistanê daye avakirin ev model ji bo gelê kurd û Rojhilata Navîn derbasdar e. Birêz Ocalan dibêje; aştiya ku pêk bê, encex bi muzakereyan bê çareserkirin.”
Civîna gel, piştî xwedina perspektîfê bi pirs, bersiv û nîqaşan bi dawî bû.
