Rêxistina Mafên Mirovan a Kurdistanê, destnîşan kir ku Rejîma Îranê di her kêliyê de dikare sê girtiyên siyasî yên Kurd darve bike.
Sê girtiyên siyasî yên Kurd ku cezayê darvekirinê li wan hatiye birîn ji Ûrmiyeyê mişextî girtîgeheke din hatin kirin. Rêxistina Mafên Mirovan a Kurdistanê da zanîn ku metirsî heye ku rejîma Îranê 3 girtiyên siyasî yên Kurd di her kêliyê de darve bike.
Rêxistina Mafê Mirovan a Kurdistanê bi daxuyaniyekê ragihand ku duh sê girtiyên siyasî yên bi cezayê darvekirinê hatine mehkûmkirin bi navê Pejman Sultanî (30), Elî Soran Qasimî (28) û Rojgar Begzade (42) bi şêwazek ne yasayî ji girtîgeha Urmiyeyê mişextî Girtîgeha Giştî ya Sucanê kirin. Di daxuyaniyê de hate destnîşankirin ku saziyên mafên mirovan vê hewldanê wek gefek eşkere li dijî parastina jiyana wan bi nav dikin.
Rêxistinê di heman daxuyaniyê de ragihand ku veguhestina girtiyên siyasî ji Ûrmiyeyê binpêkirinek eşkere ya mafên mirovan e û got: “Malbatên her sê girtiyên siyasî ji bo zelalkirina rewşa zarokên xwe serdana rayedarên dadwerî û ewlehiyê kirin. Lê heta niha ti bersivek wernegirtine.”
Hêjayî gotinê ye ku her sê girtiyên siyasî Pejman Sultanî (30), Elî Soran Qasimî (28) û Rojgar Begzade (42), di dema Serhildana ‘Jin, Jiyan, Azadî’ de ji aliyê hêzên rejîma Îranê ve hatibûn binçavkirin. Proseya darizandinê jî li Dadgeha Şoreşê ya Ûrmiyeyê bi awayekî ne dadperwerane û bêyî amadebûna parêzerên wan hate rêvebirin. Her sê girtî bi tometa ‘serhildan, avakirina komên dijî hikûmetê, peywendî û komployên li dijî ewlehiya netewî û propagandaya li dijî dewletê’ bi cezayê darvekirinê hatin mehkûmkirin.
