Amed – Endamê Platforma Ked û Demokrasiyê ya Amedê Behçet Barût ji bo meşa ku dê di 1ê Îlonê de li Amedê bê lidarxistin banga tevlibûnê kir û got: “Ji bo aştiyeke mayînde pêk were em ê bimeşin. Lazim e em cîhaneke ku aştî lê hebe ava bikin.”
Îsal dê bi boneya 1ê Îlonê Roja Aştiyê ya Cîhanê bi dirûşma “Ji bo civaka demokratîk deng bide aştiyê” li gelek bajarên bakurê Kurdistanê û Tirkiyeyê panel, meş û miting bên lidarxistin. Tê payîn ku dê di van çalakiyan de balê bikişînin ser pêvajoya “Aştî û Civaka Demokratîk” jî. Yek ji bajarê ku dê bi boneya 1ê Îlonê meş lê bê lidarxistin jî Amed e. Li Amedê dê di pêşengtiya Platforma Ked û Demokrasiyê ya Amedê û Platforma Saziyên Demokratîk de bi tevlibûna Hevserokê Giştî yê DEM Partiyê Tûncer Bakirhan û Hevseroka KESKê Ayfer Koçakê meş bê lidarxistin. Meşa ku dê saet di 17.30ê 1ê Îlonê de bê lidarxistin dê ji ber avahiya DEM Partiyê ya Navçeya Rezanê dest pê bike li ber avahiya AZC Plaza ya li semta Ofîsê bi daxuyaniyekê bi dawî bibe. Di daxuyaniyê de dê Tûncer Bakirhan û Ayfer Koçak biaxivin.
‘Ji bo civaka demokratîk deng bide aştiyê li kolanan bin’
Di belavoka ku ji bo meşê hatiye amadekirin de jî wiha hate gotin: “Banga me ji bo gelê me, jin, ciwan, karker, kedkar û hemû bindestan e! Ji bo berfirehkirina bingeha aştiyê ya bi rêya diyalogê, ji bo meseleya Kurd bi awayekî demokratîk çareser bibe, ji bo rawestandina êrişên li dijî baweriyên cuda û jinan li Rojhilata Navîn, ji bo naskirina nasnameyan, azadiya fikr û ramanê û hemwelatîbûna wekhev, ji bo jiyaneke wekhev û adil li dijî xizanî, bêkarî û kedxwariyê, ji bo rawestandina wêrankirina ekolojik û xwezayê, ji bo rawestandina tundiya li dijî jinan, ji bo tacîdarkirina Komarê bi demokrasiyê, ji bo ku em li dora civaka demokratîk bibin yek û enternasyonaleke nû li ser bingeha aştiyê ava bikin, ji bo îro û siberoja karker, bêkar, ciwan, zarok, kedkar, bêewle û hemû bindestan em ê di 1ê Îlonê de ji bo civaka demokratîk deng bide aştiyê li kolanan bin.”
Endamê Platforma Ked û Demokrasiyê ya Amedê û Hevserokê Şaxa Hejmara 2yan a Genel Îş a Amedê ya girêdayî DÎSKê Behçet Barût têkildarî meşê ji ajansa me re axivî.
‘Lazim e em cîhaneke ku aştî lê hebe ava bikin’
Behçet Barût bal kişand ser pêvajoya heyî û xwest ku hemû gelên cîhanê piştgiriyê bidin gelê Kurd. Behçet Barût diyar kir ku divê şer êdî bê rawestandin û wiha got: “Lazim e em cîhaneke ku aştî lê hebe ava bikin. Em weke saziyên demokratîk di 1ê Îlonê de peywîra xwe pêk bînin û divê em piştgiriyê bidin vê pêvajoya aştiyê. Em dixwazin şer biqede. Ji bo wê jî em ê di 1ê Îlonê de peyamên xwe bidin hemû dinyayê.”
‘Weke gelê Amedê em ê peyamên xwe bidin hemû cîhanê’
Behçet Barût ji bo meşa 1ê Îlonê ya ku dê li Amedê bê lidarxistin banga tevlibûnê li hemû gelê Amedê kir û wiha berdewam kir: “Daxwaza me ji gelê me ew e ku di vê meşê de piştgiriya me bikin û bi hezaran kom bibin û weke gelê Amedê peyamên xwe bidin hemû cîhanê. Em ê bi zimanê dayika xwe aştiyê bixwazin. Bila êdî ciwan û malbatên me zirarê nebînin. Ji bo aştiyeke mayînde pêk were em ê bimeşin.”