Konseya Bajêr a Amedê 1emîn Civîna Meclisa Xwe ya Ziman a Asayî li Çand Amedê li dar xist. Beşdarvanan di civînê de destnîşan kirin ku ziman karekî netewî ye û divê her kes vî barî hilgirin.
Konseya Bajêr a Amedê 1emîn Civîna Meclisa Xwe ya Ziman a Asayî li Çand Amedê (Navenda Çand û Kongreyê ya Şaredariya Bajarê Mezin a Amedê) ya li navçeya Yenîşehîr a Amedê li dar xist. Nivîskar, zimanzan, rojnameger û hunermend di nav de gelek kesên ku pekhateyên saziyên di nav konseyê de cih digirin beşdarî civînê bûn. Civîn bi diyarkirina dîwanê dest pê kir. Mûrat Işikirik ê li ser navê dîwanê axivî qala armanca Meclisê û divê Meclis di mijara ziman de ji bo bajêr xebatên çawa bimeşîne kir. Gevriye Atli ya di dîwanê de cih digirt jî bi lêv kir ku divê peyzaja ziman a bajêr were çêkirin. Piştî axaftina dîwanê di mijara rêbazê de pêşniyarên beşdarvanan hatin wergirtin.
‘Ziman karekî netewî ye’
Zimanzan Bahoz Baran destnîşan kir ku karê ziman karekî netewî ye û da zanîn ku rol û misyona Amedê gelekî zêde ye. Bahoz Baran diyar kir ku plansaziyeke Kurdan a ji bo ziman nîne û bi lêv kir ku ji ber plansazî nîne di kar û xebatên ziman de encamek nayê bidestxistin. Bahoz Baran anî ziman ku divê ji bo ziman hişmendiyek were avakirin û wiha got: “Divê hiqûqa vî zimanî materyal û tiştên vî zimanî werin çêkirin. Her saziyê karê wan cuda ye. Em Kurdî standardîze bikin dê zimanê me bibe zimanê cîhanî. Divê di nava plansaziyê de kesên pispor bixebitin. Ji kîjan bîrdozî û fikrê be Kurd Kurd e, ziman berpirsyartiya herkesê ye.”
‘Divê kesên di Meclisê de cih digirin di perwerdeya Kurdî re derbas bibin’
Nivîskar Jêhat Rojhilat jî ku li ser Yekîtiya Weşangerên Kurd (YEW-KURD) axivî, xwest ku ewilî hemû kesên di nava Meclisa Bajêr de cih digirin di perwerdehiya Kurdî re derbas bibin û qala pirsgirêkên ku ziman pê re rûbirû dimîne kir.
‘Divê xebatên ziman baş bên kirin’
Dû re Hevserokê Komeleya Wêjekarên Kurd Hacî Ozkal axivî. Hacî Ozkal jî qala pirsgirêkên ku kirmanckî pê re rû bi rû dimîne kir. Beşdarvanên din ên pişt re axivîn qala dewlemendiya zimanê Kurdî kirin û xwestin ku derbarê ziman de xebatên baş bên kirin.
Piştî axaftinan ji bo rêveberiya Meclisê pêşniyar hatin kirin û 13 kes hatin hilbijartin. Meclis dê di 13ê Îlonê de bi civînekê desteya rêveberiya xwe diyar bike.
