Çalakiya rûniştinê ya li ber Konseya Ewropayê bi daxuyaniyeke girseyî bi dawî bû. Konseya Ewropa dê sibê biryara civîna xwe bi raya giştî re parve bike.
Komîteya Amadekariyê ya Meclîsa Gel a Kurd, ji bo azadiya Rêberê Gelê Kurd û daxwaza “Mafê Hêviyê” li ber avahiya Konseya Ewropayê ya li Strasbourgê dest bi çalakiyê kiribû. Çalakî di roja 3yemîn de bi dawî bû. Piştî civînên Komîteya Wezîran a Konseya Ewropayê bi dawî bû, çalakgeran daxuyanî dan çapemeniyê. Li bendê ye ku Konseya Wezîran sibê biryara xwe ragihîne. Gelek Kurdistanî û dostên wan ên ji saetên serê sibê de hatin û beşdarî çalakiyê bûn bi zimanên cuda bê navber dirûşmên “Bijî Rêber Apo”, “Jin Jiyan Azadî” û “Azadî ji bo Rêber Apo re” berz kirin.
Piştî ku civînên Komîteya Wezîran bi dawî bû û hate hînbûn ku biryar dê sibê were ragihandin, li ser banga komîteya amadekar daxuaniya çapemeniyê hat dayîn.
Endamê Konseya Rêveber a KCK’ê Zubeyir Haydar, Hevserokê KCDK-E Engîn Sever û gelek çalakvan beşdarî daxuyaniyê bûn. Hevserokê KCDK-E Engîn Sever diyar kir ku “mafê hêviyê” ne tenê pirseke hiqûqî ye, di heman demê de misogeriya aştiya civakî û çareseriyeke demokratîk e jî.
Sever, anî ziman ku divê Konseya Ewropayê li pişt biryarên xwe bisekine û got: “Îro dosyaya Rêber Apo di Konseya Wezîran a Konseya Ewropayê de hate nîqaşkirin. Em, wekî gelê Kurd, 27 sal in li van deveran têdikoşin. Banga me ji Konseya Ewropayê re ew e ku biryarên xwe bicîh bîne. Azadiya Rêber Apo tê wateya azadiya nasname, çand û zimanê gelê Kurd. Em bang li gelê xwe dikin û dibêjin; Em ê heta ku azadiya Rêber Apo pêk were li dern bin û hemû çalakiyên me wê li ser vê bingehê berdewam bikin.”
Piştî daxuyaniyê, girseyê çalakiya xwe ya rûniştinê ya sê rojan bi dirûşma “Bijî Serok Apo” bi dawî kir.
