Hevseroka Ofîsa Ragihandinê ya MSDê Şêra Osê anî ziman ku êrişên Tirkiyeyê û komên çekdar ên giredayî wê li ser herêmê berdewam dikin û got: “Em di rewşeke pir bi xeter de derbas dibin. Ji bo wê jî ya herî girîng yekitiya neteweyî ya Kurd e. Ji bo yekitiyek ava bibe xebatên me bênavber didomin.”
Êrişên komên çekdar ên giredayî Tirkiyeyê li ser Bendava Tişrîn û Pira Qereqozakê ên li ser rojavayê Kurdistanê berdewam dike. Li gundên Kobanê û bajarokê Eyn Îsa û Hesekê jî Tirkiye bi SÎHAyan êriş dike û heta niha di êrişên Tirkiyeyê de rojnameger Cîhan Bîlgîn û Nazim Deştan û gelek welatiyên sivîl jî jiyana xwe ji dest dan. Li dijî êrişên komên çekdar ên giredayî Tirkiyeyê hezên Yekiniyên Parastina Gel (YPG) û Hezên Parastina Jinan (YPJ) bersiv didin û nahêlin ku komên çekdar derbasî herême bibin. Her wiha gelê rojavayê Kurdistanê ango Bakur û Rojhilatê Suriyeyê jî piştî bangawaziya Hezên Suriyeya Demokratîk (HSD) rahiştin çekên xwe û parastina gund û bajarên xwe dikin.
Ji aliyê din ve jî Rêveberiya Xweser a Demokratîk a Bakur û Rojhilatê Suriyeyê ji bo pêşî li êrişên Tirkiyeyê bê girtin û di qonaxa nû ya Suriyeyê de Kurd bi yek şandê biçin Şamê û pirsgirêkên Suriyeyê bi rêya diyaloge bên çareserkirin bang li hemû hez û partiyên Kurd kir. Piştî bangawaziya Rêveberiya Xweser a Demokratîk bi komxebat û civînan hewldanên avakirina yekitiya neteweyî ya Kurd berdewam dike.
Hevseroka Ofîsa Ragihandinê ya Meclisa Suriyeya Demokratîk (MSD) Şêra Osê tekildarî geşedanên li herême û xebatên avakirina yekitiya neteweyî ya Kurd ji Ajansa Welat re axivî.
‘Berxwedana li dijî çeteyan didome’
Şêra Osê anî ziman ku Tirkiyeyê tu caran ji armanca dagirkirina herêma Bakur û Rojhilatê Suriyeyê ranewestiyayê û got: “Helbet ji her kesî ve xuya ye, ku Tirkiyê tu carî ji armanckirina herêmên Bakur û Rojhilatê Sûriyê ranewestiyaye, lê belê her tim hewl daye ku her cihî dagir bike. Ji bo ku tirsê û rewşa bê ewlehiyê li herêmê bi cih bike. Ev yek di êrîşa dewleta Tirk û çeteyên wê ya li ser Minbicê de, her wiha binpêkirinên ku di encama wê êrişê û têkçûna pergala xizmetguzarî û ewlehiyê de pêk hatin, diyar bû. Her wiha hewl dide êrîşên xwe yên li dijî Kobanê bidomîne, bi komkirina keriyên leşkerî li ser sînor û pejiranda polîtîkaya şerê medyayê yê taybet. Derbara rewşa leşkerî de, em dikarin bêjin tevlî ku rêkeftinên agirbestê li Minbic, Kobanî, Bendava Tişrîn û Pira Qereqozak heye. Hîna jî êrişên dewleta Tirk û çeteyên wê yên ku ji xwe re dibêjin ‘Artêşa Neteweyî’ didomin. Di heman demê de hêzên HSDê heya niha, li dijî hemû hewldanên çeteyan bi awayekî berdewam li ber xwe didin.”
‘Rewşeke dîrokî û çarenûsê li Rojava heye’
Şêra Osê destnîşan kir ku di pêvajoya heyî de li dijî êrişan û ji bo diyarkirina çarenûsa siberoja Sûriyeyê de pêwîstî bi yekitiya neteweyî ya Kurd heye û axaftina xwe wiha domand: “Weke MSDê her tim me pêwîstiya diyaloga Kurdî weke erkeke neteweyî derxistiye pêş. Her wiha her xebatên me yên ji bo avakirina yekitiya neteweyî berdewam dike û weke MSD di vê mijarê de xwedî rolekî girîng in. Her wiha komîteyên ku li ser dosyaya kurdî dixebitîn hebûn û berdewamin. Di van demen dawî de jî ji bo gel bandorê li ser partiyên Kurdistanî bike û hezên Kurd bi yekrêziyeke helwest nîşan bidin ketin nava hewldanan. Taybet jî ji bo vê qonaxa nû ya Sûriyeyê, yekitiya neteweyî ya Kurd pirr girîng e. Her wiha me her tim bang kir û peyamên zelal ji bona pêwîstiya bersivdana daxwazên gel dan. Ku ev jî weke rewşeke dîrokî û çarenûseyê ji bo doza Kurd tê destnîşankirin.”
‘Divê Kurd bi yek şandê biçin Şamê’
Şêra Osê bi lêv kir ku quanaxa nû ya Suriyeyê û guherînin herême divê ji aliyê hezên Kurd ve baş bê xwendin û axaftina xwe wiha domand: “Hem ji bo gelê Suriyeyê bi giştî û hem jî ji bo gelê Kurd em di qonaxeke çareseriyê de derbas dibin. Ev demeke dirêje li ser aliyên Kurdî ku lihevkirinek mayînde çêbikin. Di qonaxa îro de jî pêwîstiya diyaloga Kurdî û hebûna belgenameyeke hevbeş a xebatê di navbera aliyên Kurdî de, bûye mijareke sereke. Pêwîstê Kurd bi yekrêziyeke tevbigerin û bi şandeyeke biçin Şamê û ji bo mafê Kurdan diyaloge li pêş bixin. Ji bo di Sûriyeya nû de Kurd mafê xwe bi dest bixînin pêwîstî bi vê yekê heye.”
‘Xebatên avakirina yekitiya neteweyî ya Kurd berdewam dike’
Şêra Osê bal kişand ser xebatên avakirina yekitiya neteweyî ya Kurd û axaftina xwe wiha bi dawî kir: “Ji aliyê kesên serbixwe, saziyên civakî û şandeya Kongreya Neteweya Kurdistan (KNK) ve komxebat tên lidarxistin. Bi komxebat û civînan ji hemû aliyên Kurd ve diyalog tên nîqaşkirin. Her wiha Mazlûm Ebdî jî ji bo yekitiya Kurdî ava bibe di nava hewldanan de ye. Diyaloga Kurdî pir girîng e. Ji ber ku em di rewşeke pir bi xeter re derbas dibin. Herêmên me ji aliyê dewleta Tirk ve bi awayekî hovane di bin êrişan de ne. Ji bo em van êrişan rawestînin û di vê qonaxa nû de mafê xwe bi destbixin û destkêftiyên xwe mîsoger bikin a herî girîng yekitiya neteweyî ya Kurd e. Ji bo wê jî bênavber xebat û hewldanan avakirina yekitiya neteweyî ya Kurd berdewam dike.”
