Riha – Meşa TJAyê di roja sêyemîn de berdewam dike. Hevşaredara Wanê Neslîhan Şedal a tev li meşê bûye destnîşan kir ku ji bo ku ev pêvajo bi awayekî bi rêk û pêk bi rê ve biçe pêdiviya herî mezin azadiya fizîkî ya Rêberê Gelê Kurd Abdullah Ocalan e.
Tevgera Jinên Azad (TJA) ji Amedê ber bi Enqereyê ve bi dirûşma “Em bi hêviyê ber bi azadiyê ve dimeşin” di 1ê Cotmehê de ji Amedê ber bi Enqereyê ve meş da destpêkirin. Meş, di roja sêyemîn de li navçeyên Rihayê berdewam dike. Di meşa ku sê roj in didome de jinan bi dirûşmên cur bi cur daxwazên xwe anîn. Coşa jinan kêliyekê jî kêm nebûye û diçin kîjan navçe û gundan jî bi coş tên pêşwazîkirin. Jinên meşvan ku li navçeya Curnê Reş bi laçikên spî ji aliyê sedan kesan ve hatin pêşwazîkirin li navçeya Xelfetiyê jî bi qurnefîlan û alên ku wêneyê Rêberê Gelê Kurd Abdullah Ocalan li serê bûn hatin pêşwazîkirin. Jinên ku di azadiyê de bi biryar û israr in, destnîşan dikin ku daxwaza wan a sereke azadiya Rêberê Gelê Kurd Abdullah Ocalan e û heta ev yek pêk were dê xebatên xwe bidomînin.
Hevşaredara Bajarê Mezin a Wanê Neslîhan Şedal a ku qeyim tayînî şûna wê hate kirin jî yek ji çalakgera Meşa Azadiyê ye. Neslîhan Şedal têkildarî armanca meşê û daxwazên xwe ji ajansa me re axivî.
‘Divê ewilî azadiya birêz Abdullah Ocalan pêk were’
Neslîhan Şedal bal kişand ser banga “Aştî û Civaka Demokratîk” a Rêberê Gelê Kurd Abdullah Ocalan û wiha got: “Ji wê rojê heta îro kesên ku dixwazin aştî pêk were, civak demokratîk be, ji bo edalet û demokrasiyê têkoşîna xwe domandin û li ber xwe didin bi kelecaneke mezin xwedî li vê bangê derketin. Bi taybetî gelê Kurd gelên ku dixwazin bi nirxên xwe bi çand û zimanê xwe bijîn xwedî li vê bangawaziyê derketin. Em ji destpêkê heta îro dibêjin; meşa jinan a azadiyê, demokrasiye û wekheviyê niha dest pê nekiriye. Bi salane bi awayekî xurt û bêhempa têkoşînek tê meşandin. Niha jî têkoşîna jinan ji bo xwedîlêderketina bangawaziya Rêber Abdullah Ocalan e. Ji ber ku em azadiya wî ya fizîkî weke azadiya jinê azadiya civakan dibînin û wisa penase dikin. Ji ber vê yekê sedem û armanca meşa me ya herî mezin azadiya fizîkî ya Rêberê Gelan Abdullah Ocalan e. Ji bo ku ev pêvajo bi awayekî demokratîk û bi rêk û pêk bi rê ve biçe pêdiviya herî mezin azadiya fizîkî ya birêz Abdullah Ocalan e. Divê ewilî azadiya pêk were ku ev pêvajo bibe pêvajoya aştiyê û civak jî bibe civakeke demokratîk.”
‘Gava ku demildest bê avêtin ew e ku mafê hêviyê pêk were’
Neslîhan Şedal da zanîn ku ji bo meseleya Kurd çareser bibe divê hinek gav bên avêtin û wiha domand: “Gava ku demildest bê avêetin ew e ku mafê hêviyê pêk were. Heke mafê hêviyê pêk were dê Rêberê Gelan Abdullah Ocalan jî dê li ser vê pêvajoyê baştir bixebite û gotinên aştî û azadiyê dê baştir cihê xwe bibînin. Helbet armanceke me ya din a mezin a vê meşe ew e ku pirsgirêka Kurd were çareserkirin. Bi taybetî jin di nava vê pêvajoyê de cihê xwe bigirin û gotina xwe ya li ser azadî û aştiyê jî bibêjin.”
‘Rêya siyaseta demokratîk hatiye xetimandin’
Neslîhan Şedal bi lêv kir ku li her derê berxwedaneke bêhempa tê meşandin û wiha pê de çû: “Ew cihên ku lê berxwedan tê meşandin, em dixwazin ev hevalên me yên vê berxwedanê dimeşînin werin tev li siyaseta demokratîk bibin. Ev meseleyeke gelekî girîng e. Ji ber ku meseleya Kurd weke pirsgirêkekê hatibe avakirin, rêya siyaseta demokratîk hatiye xetimandin. Nirxên gelê Kurd, zimanê gelê Kurd, zimanê gelan hatine qedexekirin ku ev têkoşîne tê meşandin. Ji ber vê yekê heke ev pêvajo bibe pêvajoya aştiyê divê ev gav jî bên avêtin. Her wiha divê deriyên girtîgehan bên vekirin. Girtiyên nexweş û tevahiya hevalên me yên siyaseta demokratîk dimeşandin û niha di girtîgehan de ne divê ku hemû azad bibin û îro bên li qada siyasetê siyaseteke demokratîk bimeşînin.”
‘Divê îradeya gelan bê nasîn’
Neslîhan Şedal destnîşan kir ku armanceke din a meşa wan ew e ku îradeya gelan bê nasîn û wiha dirêjî da axaftina xwe: “Demekî dirêj di pêşengtiya desthilat û dewleta Tirk îradeya gelan, îradeya gelê Kurd nayê nasîn. Şaredariyên gelan tên desteserkirin û pirsgirêkên gelê Kurd û Kurdistanê di qada rêveberiyên xwecihî de bizanebûn û polîtîkayên qirêj tê kûrkirin. Heke îradeya gelan îradeya jinan bê nasîn helbet ev pirsgirêkên di qada xwecihî de jî dê bi awayekî bingehîn werin çareserkirin.”
‘Heta ku civak azad bibe wê meşên me dewam bikin’
Neslîhan Şedal axaftina xwe wiha bi dawî kir: “Armanca me ya herî mezin ew e ku mafê hêviyê pêk were. Me ji Amedê dest pê kir em ê heta Enqereyê bimeşin. Li her cihê ku em lê bisekinin em ê weke jin weke TJA gotina xwe ya li ser azadiyê û aştiyê bibêjin. Heta ku ev civak azad bibe û aştî pêk were. Ev civak bibe civakeke demokratîk jî em ê meşa xwe berdewam bikin. Dê serkeftin bi azadiya Rêberê Gelan Abdullah Ocalan pêk were. Aştî encax wisa pêk were. Azadiya jinan û gelan encax wisa pêk were.”
