Girtiyên siyasî yên PAJK û PKKê yên li girtîgehên Tirkiyeyê, bang li hemû kesan kirin ku xwedî li Şoreşa Rojava derbikevin û her derê bikin qada berxwedan û serhildanê.
Girtiyên PAJK û PKKê, têkildarî êrîşên li ser Rojava peyamek parve kirin û xwestin her kes li Şoreşa Rojava xwedî derkevin. Girtiyan diyar kirin ku li dijî hêzên mêtinger şerê hebûn-tunebûnê tê meşandin û destnîşan kirin ku parastina şoreşa ku bi xwîna bi hezaran şehîdan hatî avakirin, wezîfeyeke esas e.
Li ser navê girtiyên PAJK û PKK’î yên li girtîgehên Tirkiyeyê, Denîz Kaya daxuyanî da. Denîz Kaya anî ziman ku gelê Rojava bi biryar in ku destkeftiyên azadiyê yên li Rojava bi fedayîtî û lehengiyên mezin hatine bidestxistin, biparêzin û wiha got: “Em berxwedana destanî ya gelê Rojava û hevrêyên xwe yên li eniyan li dijî gefa qirkirinê li ber xwe didin, silav dikin; li ku derê dibe bila bibe em ê dilsoziya xwe ya bi hevrêyên xwe yên şehîd û zarokên bi rûmet ên gelê xwe re bi berxwedana heta serketinê bidomînin.”
Denîz Kaya, anî ziman ku felsefeya azadiyê ya Abdullah Ocalan ji bo gelên Rojhilata Navîn ronahiyeke hêviyê afirand û di şênberiya Şoreşa Rojava de veguherî meşaleya azadiyê û ji bo lêgerînvanên jiyana alternatîf, bûye îlham. Denîz Kaya, destnîşan kir ku Şoreşa Rojava bûye taca serketinê ya têkoşîna Kurdan a 40 salan û wiha lê zêde kir: “Şoreşa Rojava di wê îdîa û biryardariyê de ye ku pirsgirêka azadiyê ya mirovahiyê çareser bike. Ev şoreş bûye serketina hemû gelên bindest a li hemberî modernîteya kapîtalîst. Şoreşa Rojava serketina herî binirx e ku şaristaniya demokratîk li dijî şaristaniya kapîtalîst bi dest xistiye. Serketina li Rojava, pêl bi pêl belav bû û xwedî karakterek welê ye ku hemû Rojhilata Navîn û cîhanê bandor bike. Tirsa herî zêde ya hêzên şaristaniya kapîtalîst jî ev e. Destpêkê rêxistineke weke DAÎŞ’ê bi kar anîn, plan kirin li dijî gelê me qirkirinê pêk bînin û xwestin şoreşê tune bikin. Yên ku bi berxwedana bi heybet a gelê me têk çûne, di şexsê DAIŞê de hêzên qirker bûn.”
Denîz Kaya, herî dawî anî ziman ku wekî girtiyên PKK û PAJKê mîna her tim îro jî amade ne ku ji bo gelê xwe yê bi rûmet her tiştê bikin û got: “Eger me di berxwedana Kobanê de wezîfeya xwe pêk anîbe, bila gumana ti kesê nebe em ê îro jî heman tiştê bikin. Weke girtiyan di serî de malbatên me yên berxwedêr, em bang li ciwanên fedayiyên Rêber Apo û gelê xwe yê welatparêz dikin ku em xwedî li Şoreşa Rojava derbikevin; em her derê bikin qada berxwedanê û serhildanan mezin bikin. Car din em her kesê ji bo parastina Şoreşa Rojava têdikoşe, silav dikin û hêzên dagirker û mêtinger jî lanet dikin.”
