Li Amedê cara yekem Şaredariya Bajarê Mezin çû pîsta balafirgeha leşkerî û ji berfê paqij kir. Hevşaredar Serra Bucak diyar kir ku destûr nehatiye dayîn ku dîmen-wêneyê paqijkirinê bê girtin û xwest balafirgehek sivîl bê çêkirin.
Li Amedê roja ewilî 29ê Kanûna 2025an berfê lê kir. Piştî du rojan 31ê Kanûnê berfê dîsa dest pê kir û heta 1ê Çileya 2026an berdewam kir. Du rojan bênavber berf bariya. Rê û cade hatin girtin. Ji ber berf û qeşayê pîsta Balafirgeha Leşkerî ya Amedê ku ji bo balafirên sivîl tê bikaranîn jî ji çûnehate re hate girtin.
Tîmên Şaredariya Bajarê Mezin a Amedê çend roj in bênavber li ser rê û cadeyan berfê paqij dike. Ev xebat bê navber berdewam dike.
Di nav van cihên ku hatine paqijkirin de jî Balafirgeha Leşkerî ya Amedê jî heye. Lê balkêş e ku pîsta balafirgeha leşkerî ji bo balafirên rêwiyan ango sivîl jî tê bikaranîn. Duh rayedarên balafirgehê ji Şaredariya Bajarê Mezin a Amedê alîkarî daxwaz kirin e. Şaredarî tîmek paqijiyê şand balafirgehê û pîstê ji berf û qeşayê paqij kirin ku balafirên sivîl dikaribin rabin û deynin.
Hevseroka Şaredariya Bajarê Mezin a Amedê Serra Bucak têkildarî paqijkirina pîsta balafirgehê li ser hesabê xwe yê Xê daxuyaniyek da û xwest ku li Amedê balafirgeha sivîl bê avakirin.
Alîkarî xwestin lê destûra dîmen-wêne nedan!
Serra Bucak li ser Xê ev daxuyanî da: “Duh êvarê li ser rica û daxwaza berpirsyarên balafrigeha Amedê me tîmên xwe yên paqijkirina rê şand û pîsta balafirgehê paqij kir û pîstê xwê kirin. Pîsta balafirgehê ji bo balafir rabin û deynin hate amadekirin. Em vêya jî bêjin; destûr nehatiye dayîn ku dîmen û wêneyên paqijkirina balafirgeha leşkerî bê girtin. Em bi vê wesîleyê dibêjin û bi bîr dixin ku divê teqez li Amedê balafirgehek sivîl bê çêkirin.”
