Welatiyên amedî ku li dijî êrişên li ser taxên Şêxmeqsûd û Eşrefiyê rabûn ser pêyan, hêrs û nerazîbûna xwe nîşan dan û gotin: “Divê gelê me li her derê li dijî van êrîşan dengê xwe derxîne. Rojava tune bibe Amed jî dê tune bibe.”
Di pêşengiya Platforma Saziyên Demokratîk de li gelek bajarên bakurê Kurdistanê û Tirkiyeyê têkildarî êrişên çeteyên Hikumeta Demkî ya Sûriyeyê û dewleta Tirk ên li dijî Taxên Şêxmeqsûd, Eşrefiye û Benî Zêdê yên Helebê meş û daxuyanî hatin lidarxistin. Yek ji bajarên ku meş lê hate lidarxistin û daxuyanî lê hate dayîn jî Amed bû. Welatiyên amedî di meşê de bertek nîşan dan û derheqê êrîşên li dijî taxan de ji ajansa me re axivîn.
‘Em parçeyek in, em dilek in’
Welatiya bi navê Delal Aktaş diyar kir ku êrîşên li ser taxên Şêxmeqsûd û Eşrefiyeyê tên kirin nayên qebûl kirin û êriş şermezar kir. Delal Aktaş anî ziman ku dewleta Tirk naxwaze Rojava ser bikeve û wiha got: “Ji ber ku Rojava serkeftî bû, nahêlin ku serkeftî bimîne. Ji ber vê yekê em hemî li pişt Rojava ne. Rojava Bakur e, Bakur Rojava ye; her wiha wekî Rojhilat û Başûr e. Bila Bakur û Başûr bêdeng nemînin. Bi Xwedê, em parçeyek in, em dilek in. Bila her kes vê yekê bizanibe.”
‘Bila Rojava bizanibe ku em li pişt wan in’
Delal Aktaş di berdewama axaftina xwe de wiha bi lêv kir: “Ez bang li gelê xwe dikim; bila rabin ser pêyan. Heta ku em ranebin, dijminê hov dê her roj êriş bike. Bila baş bê zanîn; em tev rabin, dest bidin hev, dest bidin Serokê xwe û dest bidin Rojavaya xwe. Rewşa Rojhilat nebaş e, ya Rojava jî nebaş e. Bi Xwedê, sibê dora me ye jî. Gava em tev rabin, belkî em bikarin vê zincîrê bişikînin. Heke em ranebin, jixwe dijminê Bakur xedar e. Wê demê em ê nikaribin nefesê bistînin û ji malên xwe derkevin. Ger em nebin yek, em ê yek bi yek winda bikin. Bila Rojava bizanibe ku em li pişt wan in. Em vî şerê ku li ser wan tê meşandin şermezar dikin.”
‘Em ê li her derê dengê xwe derxînin’
Rêveberê DEM Partiyê ya Bismilê Abdulkerîm Yildiz jî wiha got: “Em ji navçeya Bismilê ji bo Rojava hatine. Gava ku Rojava tune be, em hemû tune ne. Der barê Rojava de çi bedeleke giran hebe em ê bidin; em ji bo vê yekê amade ne. Rojava îrade ya gelê Kurd bi xwe ye. Yanî bila kes nebêje Rojava tune ye; gava Rojava tune bibe, wê Amed jî tune bibe. Heke Amed hebe, wê Rojava jî hebe. Em vê rewşê tu carî qebûl nakin. Em ê li her derê dengê xwe bilind bikin.”
‘Serkeftin dê ya me be’
Welatiyê bi navê Emîn Ermîn jî anî ziman ku li dijî êrîşên li ser taxên Şêxmeqsûd û Eşrefiyeyê tev li meşê bûye û wiha axivî: “Li Bakur, li Rojhilat û li çar parçeyên Kurdistanê jî em aştîxwaz in. Lê belê xwînxwar zextên xwe li ser me didomînin û her dem komkujiyan pêk tînin. Em niha vê yekê şermezar dikin, em êrîşan lanet dikin. Em van welatên li pişt wan jî rexne dikin û lanet dikin. Serkeftin dê ya me be.”
‘Banga me her tim ji bo aştiyê ye’
Hevserokê Rêxistina DBPê ya Bismilê Yûsûf Ataş jî bal kişand ser pêvajoya “Aştî û Civaka Demokratîk” a li Tirkiyeyê û Bakurê Kurdistanê û wiha got: “Bi destpêkirina pêvajoya aştiyê re Serokatî ji bo aştiya li Kurdistanê û li tevahiya cîhanê bang kir. Ji bo vê yekê divê hemû sazî, partî û gelê me dest bidin hev û em xwedî li hev derkevin. Çi siyasî be, çi civakî be, ya herî girîng exlaq û mirovahî ye. Divê em li ser vê bingehê xwedî li hev derkevin. Di nava van 50 salên borî de me gelek bedel û ked dan. Îro Rojava bi hezaran bedel dane. Em li her derê ne. Banga me her tim ji bo aşitiyê ye.”
‘Yekîtî hêza me ye’
Welatî Muhammed Ekîncî jî diyar kir ku divê gelê Kurd rabe ser pêyan, li dijî êrîşên li ser Helebê pêk tên denge xwe bilind bike û got: “Şerê ku niha li Rojava û Rojhilat dest pê kiriye û kuştina mirovên me, qebûl nakin. Em dixwazin ku gelê me rabe ser pêyan û bila dengê xwe bilind bike. Armanca me ew e ku em yekîtî û tifaqa xwe bikin yek. Em van qirkirin û qetilkirinan qebûl nakin. Dewletên desthilatdar naxwazin ku Kurd tifaqa xwe, yekîtiya xwe xurt bikin. Lewre dema Kurd bibin yek, desthilatdar naxwazin armanca Kurdan pêk were û axa me azad bibe. Divê gelê me li her derê li dijî van êrîşan dengê xwe derxîne. Yekîtî hêza me ye.”
