Amed – Endama Lijneya Rêveberiya Navendî ya DBPê Elîf Tîrenç Îpek têkildarî êrişên li dijî Taxên Şexmeqsûd û Eşrefiyeyê destnîşan kir ku gelê Kurd bi avakirina yekîtiyê dikare pêşiyê li êrişan bigire û got: “Heke em nebin yek û weke gel bi hev re ji van êrişan re nebin bersiv dê gelê Kurd bi qirkirinê re rû bi rû bimîne.”
Komên paramîlîter ên girêdayî hikûmeta demkî ya Sûriyeyê û Tirkiyeyê, ji 6ê Çileyê ve êrişên dijwar dibin ser taxên Şêxmeqsûd, Eşrefiye û Benî Zêdê yê Helebê. Li Kurdistan, Tirkiye û welatên Ewropayê gelek kes daketin kolanan û ev êriş şermezar kirin. Endama Lijneya Rêveberiya Navendî (MYK) ya Partiya Herêmên Demokratîk (DBP) Elîf Tîrenç Îpek têkildarî êrişan ji ajansa me re axivî û destnîşan kir ku gelê Kurd bi avakirina yekîtiyê dikare pêşiyê li êrişan bigire.
‘Tirkiye bi feraseta mêtîngeriyê tevdigere’
Elîf Tîrenç Îpek qala polîtîkayên dewletên emperyalîst ên li ser Rojhilata Navîn kir û bal kişand ser hesabên Amerîka, Îsraîl û Ingilîstanê yên li ser Sûriyeyê. Elîf Îpek Tîrenç diyar kir ku Tirkiye jî hêzeke emperyal e û got: “Tirkiye bi feraseta mêtîngeriyê tevdigere. Tirkiye dixwaze li Sûriyeyê para xwe bigire, li wir bibe xwedî gotinek û bibe şirîka desthilata li wê derê. Tirkiye îhtîmala ku gelê Kurd li Sûriyeyê destkeftiyan bidest bixe dike hinceta mayîna li Sûriyeyê. Ji ber vê yekê mudaxileyî Sûriyeyê dike. Tirkiye ji bo tevliheviya li wir bidome bi hêzên emperyal re tevdigere.”
‘Çete ji aliyê Tirkiyeyê ve tên xwedîkirin’
Elîf Îpek Tîrenç diyar kir ku bêdengiya sazî û dezgehên navneteweyî û dewletan girêdayî polîtîkayên emperyalîst in û wiha domand: “Di çarçoveya polîtîkayên ku dimeşîn in de bêdeng dimînin. Bêdengiya wan tercîheke polîtîk e. Ji ber şerê desthilatê yê li Sûriyeyê berdewam dike jî bêdengiyek heye. Îsraîl, Amerîka, Ingîlistan, Tirkiye parçeyê vê yekê ne.” Elîf Tîrenç Îpek, bal kişand ser çeteyên girêdayî Tirkiyeyê û wiha pê de çû: “Ew çete weke bingeh ji DAIŞê hatine û hêzên cîhadîst ên weke amûr tên bikaranînin. Ev çeteyên ku amûrên şer in ji aliyê Tirkiyeyê ve tên xwedîkirin. Ji ber ku tevliheviya li Sûriyeyê û Bakur û Rojhilatê Sûriyeyê bi kêrî gelek dewletan tê, bêdengiyek heye.”
‘Li Bakur pêvajoya aştiyê tê meşandin gef li Kurdên li Rojava tê xwarin’
Elîf Îpek Tîrenç qala polîtîkayên Tirkiyeyê yên di pêvajoya “Aştî û Civaka Demokratîk” de kir û ev tişt gotin: “Ji aliyê Kurdan ve hûn nikarin li bakurê Kurdistan û Tirkiyeyê bêjin aştî û li Rojava û Sûriyeyê piştevaniya şer bikin. Ev ji bo herkesê rîskeke. Tevî pêvajoya heyî Tirkiye mudaxile li destkeftiyên gelê Kurd ên li Sûriyeyê û Rojava dike. Bi vê nakokiyê ne li hundir ne jî li derve polîtîkayeke baş nikare were birêvebirin. Ji bo gelê Kurd li her çar parçeyan jî xetereya qirkirinê heye. Ji ber vê yekê nayê qebûlkirin ku di demeke li Bakur pêvajoya aştiyê tê meşandin de bi qirkirinê gef li Kurdên li Rojava bê xwarin. Kurdekî ku li ser rûyê dinê dijî vê yekê qebûl nake. Ev polîtîkayên Tirkiyeyê yên dudil hene. Ji van polîtîkayên Tirkiyeyê jî xuya dike ku pêvajoya ‘Aştî û Civaka Demokratîk’ ji bo wê çi îfade dike. Ji ber heta niha di pêvajoyê de her tim mijûl dikin. Hêj gaveke şênber neavêtin. Ji ber vê yekê jî bawerî jî neda gelê me yê li vir. Polîtîkayên qirkirinê ku Tirkiye li Sûriyeyê û Bakur û Rojhilatê Sûriyeyê li dijî Kurdan dimeşîne jî vê yekê piştrast dike.”
‘Divê berî her tiştî em bibin yek’
Elîf Tîrenç Îpek destnîşan kir ku ji bo pêşî li êrişên li dijî taxên Şêxmeqsûd û Eşrefiyeyê bê girtin divê gelê Kurd yekîtiya xwe pêk bîne û axaftina xwe wiha bi dawî kir: “Têkildarî yekîtiyê gelek xebat hatin kirin hêj jî tên meşandin. Gelê Kurd her çiqas hatibe parçekirin jî divê ruhê yekîtiyê di nava xwe de bihewîne. Di pêvajoya Kobanê de me ev bi awayekî zelal dît. Gelê Kurd ê li Rojava bi qirqirinekê re rû bi rû ma. Bi serhildanên li Bakur û Başûr, Kobanê karî bêhnê bistîne. Ji ber vê yekê jî divê ji bo pêvajoya niha jî xebateke sereke li ser yekîtiyê bê kirin. Gotineke mezinan heye; ‘Heke em nebin yek em ê herin yek bi yek.’ Heke em nebin yek û weke gel bi hev re ji van êrişan re nebin bersiv dê gelê Kurd bi qirkirinê re rû bi rû bimîne. Divê berî her tiştî em bibin yek.”
