Rejîma Îranê piştî înternet qut kir û cereyan li ser hind bajaran birîn, înfaz û komkujiyên xwe zêde kirin. Dîmenên ji hêla welatiyan ve hatine kişandin û hatin weşandin de li gelek bajaran cenazeyên bi sedan kesan li qadan hatine rêzkirin. Li ser van dîmenên cîhan matmayî hiştin bangawaziyên mûdahalekirina li hemberî rejîma mola jî zêde bûn. Li aliyên din ligel hemû zordariyan jî şevê din li gelek bajar û bajarokên Îranê bi sed hezaran kes daketin qadan û bi hêzên rejîmê re pevçûnan berdewam kir.
Li Îranê xwepêşandanên di çarçoveya serhildana gelan de pêk tê di roja 16an de berdewam kir. Di serî de paytext Tehranê li metropolên Îranê bi sed hezaran kes daketin kolanan û îstîfaya rejîma Îranê xwestin.
Qutkirina înternet û ceyranê didome
Rejîmê bi boneya dîmenên serhildanê li hundir û derve bandor dike û bala raya giştî dikişîne di 8ê çile de li tevahiya welat înternet bi tevahî qut kir. Qutkirina înternetê di roja çaran de jî berdewam kir. Li gorî saziya şopandina înternetê ya navneteweyî li Îran di çar rojên dawiyê de daneyên înternetê ketin asta sifirê. Her wiha rejîm gelek caran li bajarên serhildan pêk tên cereyanê jî dibire û zemîna êrişan ava dike. Piştî birîna înternetê û qutkirina têkiliya ji derve rejîmê êrişên xwe zêde kirin û hejmara welatiyên hatine qetilkirin zêde dibin.
Hejmara kuştiyan zêde dibe
Li hemberî mezinbûn û berfirehbûna serhildanê ya li tevahiya bajaran rejîmê lez da girtin û înfazan. Di çend rojên dawiyê de hêzên rejîmê guleyên rasteqîn bikar tîne. Ligel qutkirina înternetê jî dîmenên çalakiyan bi riyên cuda tên şandin. Di dîmenan de xuya dike ku bi sedan cenazeyên kesên ji hêla rejîmê ve hatine înfazkirin li qadan hatine rêzkirin. Welatiyên li xizmên xwe digerin hewil didin di nav bi dehan kesên hatine qetilkirin de xizmên xwe peyda bikin. Ev dîmena ligel hewildanên tarîkirinê yên rejîmê jî derkete ji derve li cîhanê bandorek mezin kir. Li gorî çavkaniyên herêmî û rêxistinên navneteweyî hejmara kuştiyan ji 2 hezarî boriye. Piştî dîmenên bi sedan cenazeyên li erdê rêz bûyîn derketin fikara zêdebûna komkujiyên rejîmê jî zêdetir bû.
Li gel hemû êrişan çalakî nasekinin
Erişên hêzên rejîmê û zordariyên li ser gel tên meşandin hêrsa gel mezintir dike. Ligel girtin û kuştinan jî di roja 16an de jî bi sed hezaran kes daketin kolanan û xwestin ku rejîma despotîk ya molayan îstîfak bike. Şevê din li paytext Tehranê, Tebrîz, Meşhedan, Qûm, Şîraz, Benderebas, Xoy, Karaj, Îlam, Şahsavar, Qazvîn û bi sedan deverên din bi sed hezaran kes bi sloganên, “Ji dîktator re mirin”, “Bimire Xemaney” û “Azadî nêzîke, bijî şoreş” berteka xwe danîn holê û îstîfaya rejîmê kirin.
Guleyên rasteqîn hatin bikar anîn
Li gorî agahiyên ji çavkaniyên herêmî hatin girtin û dîmenên hatine bi destxistin şevê din jî hêzên rejîmê ligel bajaran êrîşî çalakiyan kirin. Di navbera gel û hêzên rejîmê de ligel bajaran heta derengî şevê pevçûnan berdewam kir. Li hemberî êrişan gel bi dar û beran bersiv da. Li hind bajaran hêzên rejîmê gulebaran kirin û li gorî agahiyan gelek kes di encama van êrişan de jiyana xwe ji dest dane û gelek jî birîndar bûne.
Rejîmê zimanê gefan bikar tîne
Qutkirina înternetê, birîna ceryanê û zêdebûna êrişan nîşan dide ku Tehran li hember zêdebûna xwepêşandanan paşve gav navêje, gefên nû dixwe û retorîka xwe hişk dike. Her wiha tevî bêaramiya li gelek bajaran nêzîk guherînê nabe. Serkirdayetiya Îranê, li şûna ku hêrsa gel qebûl bike an jî pêşniyara lihevkirinê bike, zor daye tundî û zordariya li ser gel. Ev helwest roja Înê bi awayekî herî zelal li ser televîzyona dewletê hate nîşandan, bi gefên veşartî yên li dijî xwepêşanderan. Medyaya rejîmê jî gel wekî pêlîstokên Amerîka û Îsraîl3e nîşan dide û hewil dide komkujiyan rewa bike.
10 fermandarên rejîmê hatine kuştin
Şaredarê Tehranê Elîreza Zekanî ku tev li televîzoynek nêzî rejîmê bû, daxuyand ku heta niha 10 fermandarên hêzên rejîmê jiyana xwe ji destane û bi vê boneyê gel tehdît kir. Her wiha Zekanî şewitandina saziyên rejîmê jî bi bîr xist û ev yek wekî nîşaneya lîstikên hêzên derveyî nîşan dan. Ligel hemû zordariyên rejîmê jî hindî diçe zêdetir gel tev li serhildanê dibin û her wiha berteka xwe ya li hemberî rejîmê bi rêbazên cudatir nîşan didin.
Cîhan piştgiriya gelê Îranê dike
Ligel ku rejîma Îranê di hundir de bi qutkirina înternetê û birîna ceryanê hewil dide serhildanê bi şidetê tepisîne jî dengê berxwedanê li tevahiya cîhanê belav bû. Gelên Îranê yên li derveyî welat dijîn li welatên wekî Amerîka, Kanada, Ingilîstan, Holanda, Îskoçya, Îtalya û gelek welatên din daketin kolanan. Bi sed hezaran kesên meşiyan piştgirî dan serhildanê û rejîma Îranê protesto kirin. Di meşan de ala Îranê ya niha hate şewitandin û li şûna wê ala Îranê ya berê hate rakirin. Di meşan de sloganên rejîm û sûcên wê şermezar dikin hatin berzkirin û daxwaza îstîfayê hate kirin.
Bangawaziya alîkariya navneteweyî
Di meşên girseyî pêk hatîn de gelek axaftvan û meşvanan balkişandin ser komkujiyên pêk tên û banga mûdahaleya navneteweyî li Neteweyên Yekbûyî û Amerîkayê kirin. Çalakvanan xwest ku cîhana demokratîk berteka xwe nîşan bide û li hemberî komkujiyên rejîma mola bêdeng nemîne.
Tundirawek Mûcahîdên Gel êrişî girseyê kir
Li bajarê Los Angeles ê DYAyê bi deh hezaran Îranî û dostên wan bi armanca piştgiriya gelê Îranê meşiyan. Di dema meşê de kesek endamê rêxistina “Mûcahîdên Gel” ku hêzek paramîlîter a nêzîk rejîmê ye, êrişî girseyê kir. Kes li qamyoneke nivîsa, “Ji Şah re na” li ser nivîsî kete nav girseyê. Kesê wesayît ajot ser girseyê bû sedema birîndarbûna gelek kesan. Piştre girseyê mûdaheyî êrîşkar kir û bi lêdanê radestî polîsan kir.
