Platforma Jinan Wanê ji bo êrişên li ser taxên Kurdan ên Helebê daxuyaniyek da û got ku armanca vê tundiyê tinekirina têkoşîna azadiya jinên Kurd e.
Platforma Jinan Wanê, têkildarî êrişên li ser taxên Kurdan Şêxmeqsûd û Eşrefiyê yên Helebê li ber Galeriya Hunerê ya li Rêya Armûşe çalakiya runiştinê pêk anî. Di çalakiyê de dirûşmên “Bijî berxwedana rojava”, “Bijî Serok Apo”, “Bê Serok jiyan nabe” û “Şehîd namirin” hatin bêrzkirin û pankarta “Li Rojava komkujî heye, dinya bêdeng e, em ê bêdeng nemînin” hat vekirin. Endam û rêveberên partiyên siyasî, nûnerên saziyên sivîl û gelek jin tev li çalakiyê bûn.
‘Di êrîşan de herî zêde jin û zarok dibin hedef’
Endama Hiqûqnasên Ji Bo Azadiyê (OHD) ya Wanê Jiyan Ozkaplan ku metna daxuyaniyê xwend, bi lêv kir ku di van şerên qirêj ên li Rojhilata Navîn de tên meşandin, bedena jinan careke din veguheriye xenîmeta şer. Jiyan Ozkaplan diyar kir ku jin an bi kuştinê, an jî bi bedena xwe dibin hedef û got: “Avêtina bedena şervanên jin ên ji avahiyan, revandina jinan û qetilkirina zarokan ya bi awayekî hovane; encama rejîmeke tundiyê ye ku ne tenê leşkerî ye, di heman demê de ji aliyê serdestiya mêran ve jî kûr e. Armanca vê tundiyê tinekirina têkoşîna azadiya jinên Kurd e. Tişta ku îro li Rojava û Helebê diqewime ne şerekî leşkerî ye; êrişeke piralî ye ku armanca wê tunekirina hebûna civakî, çandî û siyasî ya gelê Kurd e. Di van êrişan de herî zêde jin û zarok dibin hedef ku mafên jiyana wan ji holê radike.”
‘Divê jin bêdeng nemînin’
Jiyan Ozkaplan bang li raya giştî kir û axaftina xwe wiha bi dawî anî: “Ev bûyer berdewama polîtîkayên dîrokî yên înkar û îmhakirina van xakan in. Divê jin, kedkar, rewşenbîr û parêzvanên mafên mirovan li hemberî vê hovîtiyê bêdeng nemînin. Li dijî bikaranîna bedena jinan a weke xenîmeta şer, kuştina zarokan û tinekirina gelan axaftin berpirsyariyeke dîrokî ye. Çalakiya rûniştinê ya ku me îro da destpêkirin ne tenê protesto ye, ev banga edaletê ye ku li ser navê jinên hatine qetilkirin, zarokên hatine qetilkirin û gelên ku hatine binçavkirin. Divê demildest komkujî bên rawestandin, Divê îşkence, înfaz û windakirinên bi zorê bi dawî bibin, Divê çavdêrên navneteweyî yên serbixwe bikevin herêmê û divê sûcdar bên darizandin.”
Piştî daxuyaniyê jinan bi berzkirina dirûşmeyan çalakiya rûniştinê pêk anî. Çalakî bi lêdana çepikan bi dawî bû.
