Enqere – Hevberdevkê Têkiliyên Dervê yê DEM Partiyê Berdan Ozturk têkildarî êrişên çeteyên HTŞê û SMOyê li dijî Rojava anî ziman ku dewletên navneteweyî li gorî berjewendiya xwe tevdigerin û got: “Bêjin em ê carek din bi Sykes-Picotê Rojhilata Navîn dîzayn bikin, ew hesab naçe serî.”
Çeteyên HTŞê û SMOyê bi piştgiriya Tirkiyeyê li dijî Rêveberiya Xweser a Bakur û Rojhilatê Sûriyeyê êrişên xwe didomînin. Piştî taxên Şêxmeqsûd û Eşrefiyê li Dêr Hafir û Bendava Tişrînê jî êrişên komên çete berdewam dikin. Êrişên li ser herêmê û aloziyên derketinê ji aliye raya giştî ya Kurdistanê ve bi hêrs û fikar tê şopandin. Her wiha bi naybenkariya hezên koalîsyonê ji bo rawestandina êrişan hevdîtin berdewam dikin. Her wiha derbarê êrişên çeteyan de, di qada navneteweyî de çi tê gotin û dîplomasiyeke çawa tê pêşxistin ji aliye raya giştî ve tê meraqkirin. Hevberdevkê Têkiliyên Derve ya Partiya Wekhevî û Demokrasiyê ya Gelan (DEM Partî) Berdan Ozturk, êrişên çeteyên HTŞê û SMOyê li dijî Rêveberiya Xweser a Bakur û Rojhilatê Sûriyeyê û xebatên diplomasiyê ji Ajansa Welat re nirxand.
‘Ev rejîm jî wekî rejîma berê êrişî gel û baweriyan dike’
Berdan Ozturk bi lêv kir ku hikumeta HTŞê li dijî daxwazên netew û baweriyên li Sûriyeyê polîkayên êrişê dide meşandin û wiha got: “Weke rejîma beriya xwe polîtikayên li dijî netew û baweriyan didomîne. Gelên Sûriyeyê di serî de gelê Kurd ji bo daxwazên xwe daketine kolanan û 15 sal berê şerekî navxweyî derket holê. Divê dewletên herêmê jî ji vê rewşê derseke bigirin. Bi polîtikayên tunehesibandin, zext û tundiyan tu kes nikarê bigeheje çareseriyeke.”
‘Tunehesibandin dê tevliheviyê kûr bike’
Li ser rewşa niha li Sûriyê derketiye holê jî Ozturk anî ziman ku firsetek girîng li pêşiya Sûriyê heye û wiha domand: “Tirkiye bi HTŞ û komên din ên girêdayî xwe re ji bo Kurd nebin xwedî destkeftî gefên êrişê dixwe û tevliheviyê derdixînin. Divê rastiya gelê Kurd û Rojhilata Navîn berbiçav bigirin û çareseriyê pêşbixînin. Bi desthilatiya Şara û tunehesibandina netew û baweriyan li Sûriyeyê çareseriyeke mayindê pêknayê. Di dawiyê de dîsa tevlihevî dê çêbibe.”
‘Tirkiye û Îsraîl li ser çarenûsa gelan bazariyê dikin’
Ozturk bal kişand ser civîna Parîsê ya di navbera Îsraîl û HTŞê de pêkat û anî ziman ku Îsraîl û Tirkiye li ser çarenûsa gelên din bazariyê dikin. Ozturk wiha dirêjî da axaftina xwe: “Rejîmên ku li ser tunehesibandina netew û baweriyan avabûyê divê be guherandin. Divê ew heşmendî biguherê. Aramî bi awayî pêktê. Bi nêzikatiyê sed sal berê vê bersiv bidin daxwazên gel dê encame de têkbiçin. Tirkiye dibêje Kurd û Îsraîlê li hev kirinê lê li ser berjewendiyên destkêftiyên Kurdan ji holê rakin Tirkiye bi Îsraîlê re li hev dike.”
‘Fîdan wekî wezîrê Sûriyê tevdigere’
Ozturk gefên Wezîrê Karên Derve Hakan Fîdan bi bîr xistin û diyar kir ku Fîdan weke ne Wezîrê Karên Derve yê Tirkiyeyê lê yê Sûriyeyê be, tevdigere. Ozturk li ser mijarê ev nirxandin kir: “Bi Sykes-Picotek din dixwazin careke din Rojhilata Navîn dîzayn bikin lê ev hesab naçe serî. Divê Tirkiye ne li Sûriyê pirsgirêka Kurd li Tirkiyeyê çareser bike. 50 sal e hemû derfetên şer bikaranîn lê nekarîn çareser bikin. Niha firseteke mezin heye. Lê vê firsete baş bikarnaynin. Hewil didin li Sûriyê jî meseleyan bêyî Kurdan çareser bikin. Ew jî tu encameke nade. Bêyî Kurdan nikarin tu hesaban bikin.”
‘Li gorî berjewendiyên xwe tevdigerin’
Di berdewama axaftina xwe de Berdan Ozturk tekildarî dîplomasiya Kurd a li qada navneteweyî jî axivî û wiha domand: “Dîplomasiya gelê Kurd li her qadê ji bo berjewendiyên gelan biparêze tevdigere. Bêguman di aliyê dîplomasiya dewletan de kêmderfetî hene. Lê her welatekî xebatên dîplomatîk hene, Amerîka jî di nav de lê dewletên desthilat dixwazin li gor berjewendiya xwe Rojhilata Navîn dizayn bikin. Di vir de dîplomasiya em bikin dîplomasiya gelan e. Niha şûn ve jî xebatên me yên dîplomasiyê ya bi gelan re dê xurtir berdewam bikin.”
‘Ne bi gotinan divê li qadan sekna xwe nîşan bidin’
Berdan Ozturk derbarê bêhelwestbûna civaka navneteweyî de jî anî ziman ku ne tenê şermezar kirin lê helwest hewce ye û wiha pê dê çû: “Rûmeta mirovahiyê li Kobanê serket. Ji bo wê jî ne tenê bi gotinan diviya li qadan bi helwesta xwe nişan bidana. Ew êriş û rewş ne tenê ji bo Rojava, ji bo tevahiya dinyayê xetere ye. Divê ew jî hilbijartineke bikin; Heşmendiyeke weke HTŞê û Tirkiye dê Sûriyeyê dizayn bikin an kesên li dijî heşmendiya DAIŞê şer kirinê dê dîzayneke demokratik û wekhev bidin Sûriyeyê? Em di hevdîtinên xwe de jî me van pirsan dikin û van tiştan tînin ziman.”
‘Pêwistiya Kurdan bi yekîtiyê heye’
Têkildarî bandora pirsgirêka Sûriyê li ser deverên din jî Ozturt daxuyand ku pêşeroja Sûriyeyê û Rojhilata Navîn dê bandor li ser Ewropa û deverên din ên cîhanê jî bike. Ozturk ev tişt gotin: “Dê piştgiriya çi bikin; Heşmendiya DAIŞê an heşmendiya kesên li dijî DAIŞê şer kirine? Heke piştgiriya heşmendiya HTŞê bikin xetere heye ku careke din xwîn birije. DAIŞê li her derê Ewropayê êriş pêkanîn. Niha piştgiriya vê heşmendiyê bikin dê bandor li ser wan jî bike. Heke şer belav bibe dê gelek xwîn birije. Di dawiyê de dîsa çareseriya ku daxwazên gel esas digire, dikare pêk were. Birdoziya Rêberê Gelê Kurd birêz Ocalan ji bo hemû Rojhilata Navîn û gelê bindest ronahiyeke. Divê ew firset baş bê bikaranîn. Yek jî ya derketiyê holê yekitiya neteweyî ye. Divê em yekitiya xwe ya neteweyî pêk bînin.”
