Balafireke şer ên bêmirov ên Tirkiyeyê danê êvarê kargeha tamîrkirina erebeyan a li bajarê Sirînê bombebaran kir. Di êrîşê de karkerek hat kuştin û 5 karker jî birîndar bûn. Di êrîşa li dijî karwana Tişrînê de jî kesekî jiyana xwe ji dest da û 6 kes birîndar bûn. Karwanê diyar kir ku li ber bendavê çalakiya nobetê didin destpêkirin.
Li gorî agahiyên çavkaniyên Ajansa Nûçeyan a Hawarê (ANHA) balafireke bêmirov ê dewleta Tirk li bajarê Sirînê yê kantona Firatê kargeha tamîrkirina erebeyan bombebaran kir. Di êrîşa hewayî de karkerekî jiyana xwe ji dest da û 5 karkerên din jî birîndar bûn.
Çavkaniyê diyar kir ku navê karkerê ku jiyana xwe ji dest daye Xidir Mustefa Ebdo ye.
Tirkiyeyê êrîşî karwana sivîlan kir: Kesekî jiyana xwe ji dest da
Şêniyên bajarê Hesekê li ser bangewaziya Rêveberiya Xweseriya Demokratîk a Herêma Bakur û Rojhilatê Sûriyeyê bi karwaneke mezin çûn bendava Tişrînê. Dema karwan bi maşîneyan diçûn Tişrînê balafirên şer ên bêmirov êrîşî karwana sivîlan kir. Di êrîşa hewayî de kesek sivîl jiyana xwe ji dest da. Dîsa di êrîşê de 2 jin û 2 xebatkarên çapemeniyê bi giştî 6 kes birîndar bûn. Li gorî daneyên SOHRê balafirên bêmirov êrîşî maşîneya sivîlan kiriye û di encamê de kesekî jiyana xwe ji dest daye û 6 kes jî birîndar bûne.
Piştî êrîşê dîsa girseyê berê xwe da bendava Tişrînê û meşiyan. Li Bendava Tişrînê li ser navê Rêveberiya Xweseriya Demokratîk a Herêma Bakur û Rojhilatê Sûriyeyê û tevahî pêkhateyên li herêmê daxuyaniyek hat dayîn. Di daxuyaniyê de hat gotin ji bo parastina bendavê wan çalakiya nobedariyê daye destpêkirin û bang li Koalîsyona Navneteweyî dikin ku dozên li Herêma Bakur û Rojhilatê Sûriyeyê çareser bikin û êrişên dewleta Tirk a dagirker û çeteyên wê yên li dijî herêmê bi dawî bikin. Di daxuyaniyê de hat diyarkirin ku dewleta Tirk bi van êrişên xwe yên ku ji mehekê ve li dijî herêmê didomin, bi taybet êrişên li dijî Bendava Tişrînê, jiyana bi hezaran welatiyan dixe xeteriyeke mezin. Her wiha hat gotin ew van sûcan qebûl nakin û ji bo parastina Bendava Tişrînê çalakiya nobedariyê didin destpêkirin.
