Gelê Wanê ev 4 roj in li dijî êrişên ser Rojava bênavber li kolanan çalakiyan li dar dixin. Îro jî li sûka Wanê bi dirûşma “Bijî berxwedana Rojava” olan da.
Li Wanê çalakiyên li dijî êrişên li ser Rojavayê Kurdistanê di roja 4emîn de bi girseyî berdewam dike. Girseya li dijî êrişan li ber Van Mall AVMê civiyan û xwestin bimeşin. Girse bi astengkirina polîsan ve li kolanan kom bûn û bi dirûşmeyên “Bijî berxwedana Rojava”, “Bijî Serok Apo” û “Rojava Rojhilat e, Kurdistan yek welat e” meş li dar xistin. Welatiyên piştgirî dane çalakvanan derbasî tev li girseya li ber Van Mall AVMê kom bûye bûn. Girse piştre daxuyanî da.
‘Xiyanetê li Kurdan nekin’
Di daxuyaniyê de parlementerê DEM Partiyê yê Wanê Mahmûd Dîndar axivî û bang li girseya ku ev çend roj in li dijî hişmendiya DAIŞê li ber xwe didin û wiha got: “Ev sed sal in Kurd tên înkarkirin û li dijî vê înkarê jî Kurd têkoşîneke bêhempa 50 salan domandin. Birêz Ocalan ji bo jiyaneke hevpar û aştiyane di 27ê sibatê de banga ‘Aştî û Civaka Demokratîk” kir û pêvajoyek da destpêkirin. Divê bilez hûn vegerin ser maseyê û bi muzakereyan pirsgirêkan çareser bikin. Hûn niha piştgiriya hişmendiya ku serê mirovan jê dikin, dikin. Wê dîrok vê yekê binivîse. Hûn her tim dibêjin ‘Diş guçler’. Vê yekê baş bizanin ku ew hêz dê li ser vî welatî jî emeliyatekê bikin. Lewma, xiyanetê li Kurdan nekin.”
Piştî daxuyaniyê, çalakî bi berzkirina dirûşman bi dawî bû.
