Li gelek bajarên Almanya, Swîsre, Franasayê, Swêdê, Holandayê û Norweçê bi sed hezaran Kurd û dostên xwe daketin qadan û tev li banga seferberiya neteweyî ya ji bo Rojavayê Kurdistanê bûn. Di mitîngan de sloganên dilsoziya bi HSDê re berz kirin û bangên parastina şoreşa Rojavayê Kurdistanê hate kirin. Axaftvanan êriş wekî encama komploya navdewletî pênase kirin û li dijî vê komployê banga berxwedana kûrewî li hemû mirovahiyê kirin. Girseyan bi yek dengî navê Rojava berz kir û li qadan olan da.
Almanya
Li Almanyayê ku ji destpêka êrişan heta niha gelê Kurd û dostên wan li ser piyan e, îro jî dakete qadan. Li bajarên Koln, Stuttgard, Freîburg, Frankfurt, Mannheim, Bremen û Hannoverê mitîng û meş hatin lidarxistin. Bi deh hezaran Kurd û dostên wan ên ji bo Rojava kom bûn bi meş herikîn qadên mitîngê. Di meşan de alên YPG û YPJê hatin bilindkirin û pankartên komkujiyên çeteyên HTŞ, DAIŞê şermezad kirin, vekirin. Di mîtîngan de timî diruşmeyên, “Jin jiyan azadî”, “Terorîst Colanî” û “Bijî berxwedana Rojava” hatin berzkirin. Di axaftinên di mitîngan de hatin kirin de bêdengiya welatên Ewropayê ya li hemberî êrişan hate şermezar kirin û têkiliyên wan ên bi HTŞê re hatin protestokirin. Li dijî komploya navneteweyî bang li hemû gelan hate kirin ku berxwedanek kûrevî bê rêxistinkirin. Her wiha ji bo parastina Rojavayê Kurdistanê biryara berdewamkirin û mezinkirina berxwedanê hate dayîn.
Swîsre
Li bajarê Zurîhê yê Swîsreyê jî bi armanca piştgiriya Rojavayê Kurdistanê û şermezarkirina êrişên çeteyên HTŞ, DAIŞ ên girêdayî Tirkiyê, meş û mitîng hate lidarxistin. Ligel rêxistinên şoreşgerî, sazî û dezgehên Kurd bi deh hezaran Kurdistanî tev li mitîngê bûn. Di meşan û mitîngê de pankartên piştgiriya Rojav dikin hatin vekirin û dowîzên banga berxwedanê dikin, hatin rakirin. Di tevahiya meş û mitîngê de sloganên, “Bijî berxwedana Rojava”, “Yek e yek e, gelê Kurd yek e” û “Rojava Rojhilat e, Kurdistan yek welat e” berz kirin.
‘Heke em nebin yek em ê biçin yek bi yek’
Hevseroka CDK-Sê ya Swîsreyê Dîlan Çetînkaya têkildarî êrişên ku rojavayê Kurdistanê tenê kirin de axivî û balkişand ser zêdebûna êrişan. Çetînkaya wiha axivî: “Gelê Kurd bi salan e li dijî DAIŞê têkoşînê dike û ji aliyê cîhana Navneteweyî ve dixwazin bi tenê bêne hiştin. Gelê Kurd çend roj in li ser lingane û li ber xwe didin. Çawa ku di sala 2014an de Kurdan DAIŞê têk bir, dê dîsa jî wan têk bibe. Rojava namûsa cîhanê ye, divê cîhan xwedî li Rojava derbikeve. Rojava modela avakirina demokrasiyê ye. Hewceye ku em Kurd di vê rewşê de hemû bibin yek û yekîtiya xwe xurt bikin. ‘Heke em nebin yek em ê biçin yek bi yek.'” Piştî ku axaftin bi dawî bûn girseya ku ji hezaran pêk tê dest bi meşê kirin.
Hollanda
Li Bajarê Amsterdamê yê Hollandayê jî bi hezaran kes kes bi heman armancê mitîng pêk anîn. Bi hezaran Kurd û dostên wan bi merşa çerxa şoreşê dest bi meşê kirin. Di meşê de alên YPG û YPJê hatin bilind kirin û pankartên komploya navneteweyî ya li dijî Rojavayê Kurdistanê şermezar kirin. Li ser pankarta, “Rojava rûmeta mirovahiyê ye” û “Bijî şoreşa Rojava” hatin vekirin. Her wiha gelek dowîzên sûcên mirovahiyê yên çeteyên HTŞ û DAIŞê ku ji hêla Tirkiyê ve tên rêvebirin, hatin bilindkirin. Di xwepêşdanê de diruşmeyên, “Bijî berxwedana Rojava”, “Yek, yek, yek, gelê Kurd yek e” û “Bijî berxwedana Kobanê” hatin berzkirin
Jinan li qadê kezî honandin
Di dawiya meşa bi seatan dom kir de li ser navê girseyê axaftin hatin kirin. Li qadê bi sedan jin ketin rêzê û keziyên xwe honandin. Jinan di dema honandina keziyan de bênavber, “Bijî berxwedana YPJê” avêtin. Di axaftinên pêk hatîn de êrîş wekî komploya navnetewî hatin pênasekirin û hate daxuyandin ku ancax bi berxwedanek kûrevî dikare ev komplo vala bê derxistin. Axaftvanan bêdengiya Ewropayê bi tundî hate şermezar kirin û banga parastina Rojava hate dubare kirin.
Fransa
Wargehek din ku bersiva banga seferberiya neteweyî ji hêla bi hezaran kesan ve hatî bersivandin jî Parîs bû. Bi beşdariya gelek rêxistinên şoreşgerî, sazî û dezgehên Kurdan, komên dijberî pergalê ji bo xwedî derketina Rojavayê Kurdistanê gihiştin hev. Girseyê bi meş ketin qada mitîngê bi slogan, çepik û tîliliyan silav dan berxwedan û şoreşa Rojavayê Kurdistanê. Girseyê bênavber sloganên, “Wê Rojava azad bibe”, “Bijî yekîtîya gelê Kurd”, “Jin, jiyan, azadî” û “Bijî berxwedana Rojava” berz kirin. Di axaftinan de organîzekirina çeteyan a ji hêla Tirkiyê ve wekî sûcek li dijî mirovahiyê hate nirxandin û li hemberî vê siyaseta bi riya çeteyan tê meşandin banga helwest girtinê li Ewropayê hate kirin. Ji bo mezinkirin û domandina berxwedanê biryardarî hate dubarekirin.
Norweç
Li paytext Osloya Norwecê jî bi heman armancê meş û mitîng hate li darxistin. Li ser banga seferberiya neteweyî di pêşengiya sazî û dezgehên Kurdan de bi hezaran Kurdistanî û dostên wan ji bo piştgiriya Rojava gihiştin hev. Alên YPG û YPJê, pankartên dilsoziya bi Rêveberiya Xweser û şoreşa Rojava re vedibêjin hatin rakirin. Bênavber sloganên piştgiriya şoreşê hatin bilind kirin. Di dema mitîngê de belavokên agahdariyê hatin belavkirin û banga mezinkirina berwedanê hate dubarekirin. Di axaftinan de hate destnîşan kirin ku êriş bi destê Tirkiyê tên meşandin û armanca van êrişan jî tevkujiya gelê Kurd e. Di axaftinan de li welatên Ewropayê banga helwest girtinê û li gelê Kurd û dostên wan jî banga meznkirina berxwedanê hate kirin.
