Mêrdîn – Endamên Federasyona Lêkolînên Îslamî ya Mezopotamyayê, peymana di navbera HSDê û Hikumeta Demkî ya Sûriyeyê de hate îmzkirin nirxandin û diyar kirin ku ev peyman ji bo aştî û azadiyê ye û gotin bo şer jinûve dest pê neke divê wekheviyeke bêhempa çêbibe.
Di navbera Hêzên Sûriya Demokratîk (HSD) û Hikûmeta Demkî ya Sûriyeyê de di 30ê Çileyê de peymanek hate îmzekirin. Hate ragihandin ku di peymanê de HSD hebûna xwe ya leşkerî diparêze û destkeftiyên gelê Kurd ên li Rojava dê bên parastin. Her wiha hate diyarkirin ku peyman dê di 2yê Sibatê de bikeve meriyetê. Tevgera Civaka Demokratîk (TEV-DEM) peyman weke gaveke girîng a ber bi îstiqrar û rawestandina şer ve nirxand û diyar kir ku lihevkirin destpêka pêvajoyeke nû ya têkoşîna siyasî ya ji bo sepandina mafên gelan e. Endamên Federasyona Lêkolînên Îslamî ya Mezopotamyayê (MÎA-FED) têkildarî îmzekirina peymanê ji ajansa me re axivîn.
Endamê MÎA-FEDê Mele Dunyaser Dunayserî diyar kir ku peymana di navbera HSDê û Hikumeta Demkî ya Sûriyeyê de pêk hat ji bo rawestandina şer gelek baş e û wiha got: “Gelê me nayê kuştin. Şer di navbera du qewmên misilman de çênabe. Lê divê ev yek jî bê zanîn, Xwedê teala di ayetekê de dibêje ‘di navbera wan de biedalet, edalet jî ne bes e divê hûn wekheviyê çêbikin’ Ev peyam divê biedalet were bicih. Divê wekheviyeke bêhempa çêbibe ku ev şer jinûve dest pê neke.”
‘Yekîtiya gelê Kurd çete têk birin’
Mele Dunyaser Dunayserî bal kişand ser berxwedana gelê Kurd û dostên wan a ji bo Rojava û wiha berdewam kir: “Berxwedaneke pir mezin çêbû, gelê me zehmetiyên pir mezin kişand ji ber van zehmetiyên hatin kişandin jî êşa me mezin e. Tu caran bawerî bi zaliman çênabe. Divê gelê me roj bi roj li pişta berxwedêrên me be li mala xwe nerûnin ev erk û wezîfeya me hemûyan e. Ji bo ku ev sulh pêk were divê mafên gelê Kurd û gelên din jî bê dayîn. Divê gelê Kurd jî dest ji mafê xwe bernede ku ev zilm dubare nebin. Divê yekîtiya gelê Kurd pêk were. Yên ku ev çete têk birine yekîtiya gelê Kurd e. Bêyî yekîtî wê ev rewşên wiha dîsa dubare bibin.”
‘Ev peyman ji bo aştî û azadiyê ye’
Endama MÎA-FEDê Selma Ozturk jî berxwedana gelê Kurd û dostên wan a ji bo Rojava pîroz kir û wiha got: “Berxwedana gel biserket. Ev peyman ji bo aştî û azadiyê ye. Peymana başiyê ye. Em ê li ber xwe bidin. Destê me bi hevalên me re bi Rojava re ye. Bila Rojava baş bizanibe ku em wan tu car bi tenê nahêlin. Zalimtî bi sernakeve dê her tim başî û heqî bi ser bikeve.”
Endamê MÎA-FEDê Mehmet Oner jî diyar kir ku peymana hatiye îmzekirin bi wate ye û wiha got: “Pêşiya Kurdan dê bi yekîtiyê vebe. Kurdan xwe bi dinyayê da nasîn. Vî şerî Kurd hemû kirin yek. Ev peyman jî ji bo miletê Kurd baş bû. Divê hemû Kurd guhdariya Serokê xwe mezinên xwe bikin û li dora tevgera xwe kom bibin.”
