Çapemeniya Ereb di weşanên xwe yên îro de hevdîtinên partiyên Kurdan ên Başûrê Kurdistanê ji bo hilbijartina serokkomariyê girtin rojeva xwe û îhtîmala lihevkirinê dê postên hikumeta herêmî jî bigire nav xwe. Rojnameyê diyar kir ku israra YNKê ya li ser Serokomariya Iraqê didome.
Rojnameyên Erebî di hejmarên xwe yên vê sibehê de cih dan hevdîtinên PDK û YNKê yên ji bo diyarkirina Serokkomariya Iraqê nirxand. Rojnameya Şerq El Ewsat bal kişand ser dosyaya Serokkomariya Iraqê û wiha nivîsî: “Agahî hatin bidestxistin ku Partiya Demokrat a Kurdistanê (PDK) û Yekitiya Nîştimanî ya Kurdistanê (YNK) li ser destnîşankirina namzetekî gihaştine rêkeftineke destpêkê.”
‘Ji partiyên Kurd hate xwestin bi lez bikin’
Rojnameyê da zanîn ku ev lihevkirina muhtemel bi encama lihevkirina di navbera hêzên Çarçoveya Hemahengiyê yên têkildarî namzetê serokwezîr ve jî girêdayiye û ev nirxandin kirin: “Ji ber ku li gorî destûrê, serokkomar berpirsê diyarkirina namzetê bloka herî mezin a parlamentoyê ya ji bo avakirina hikumetê ye. Koalîsyonên Şîe, di nav de Koalîsyona Dewleta Qanûnê û Koalîsyona Jinûveavakirin û Geşepêdanê, bang li hêzên Kurd kiriye ku lezê bidin temamkirina şertên destûrî, di serî de jî hilbijartina serokkomariyê.”
‘YNK hêj di serokkomariyê de bi israr e’
Li gorî rojnameyê lihevkirinek di navbera her du partiyên Kurdan de nêzîk e. Rojname van agahiyan bi xwendevanên xwe re parve dike: “Ev lihevkirin dê bi lihevkirineke berfireh re were kirin ku dê hikumeta herêmê jî bigire nava xwe. Namzetiya Nûrî El Malikî ji bo serokwezîriyê hîn jî dibe sedema gumanên navxweyî û hişyariyên derveyî yên li ser bandorên potansiyel ên aborî. Di heman demê de, YNKê ji ber axaftina li ser lihevkirina dawîn hişyarî da û diyar kir ku ew israr dike ku posta serokkomariyê para wê be. Nakokî li ser dabeşkirina postan di hikumeta herêmî ya pêşerojê de jî dewam dikin.”
