Rojnamevan Ekrem Salih û Cûdî Hec Elî ku bûyerên li Şamê dişopandin, ji duh êvarê ve agahî ji wan nayê wergirtin.
Ji duh êvarê ve agahî ji nûçegihanên Channel 8 TVyê Ekrem Salih û Cûdî Hec Elî nayê wergirtin. Channel 8ê TV li ser malpera xwe têkildarî rewşa nûçegihanên daxuyaniyeke nivîskî da.
Di daxuyaniyê de wiha hat gotin: “Êvara roja çarşemê (30 Nîsan 2025) hevkarên me Ekrem Salih û Cûdî Hec Elî, rageşî û aloziyên li Şamê dişopandin. Hevkarên me heta saet 6’ê êvarê bi Navenda Nûçeyan a Kanal 8’ê re di nava têkiliyan de bûn, lê ji nişka ve têkilî bi wan re qut bû û ji wê demê ve tu agahî der barê wan de tune ne.
Hevkarên me jî li Buroya Sûriyeyê, di nav 5 mehên derbasbûyî de bi awayekî pîşeyî karên xwe bi cih anîn û bûyerên wî welatî şopandin.
Tevî hewldanên Kanal 8ê bi tevahiya aliyên têkildar, sazî û rojnamevanên serbixwe re da ku çarenûsa hevkarên me eşkere bibe, lê heta niha tu agahî der barê wan nehatine bidestxistin.”
