Amed – Akademîsyen Ferda Fahrîoglû diyar kir ku avakirina Komîsyonê tenê ne bes e û xwest Komîsyon mafan binase û biçe bi Abdullah Ocalan re hevdîtinê pêk bîne.
Tora Aştiyê ya Rexneyî ku di meha Çile ya îsal de hat avakirin, bênavber li ser aştiyê komxebatan û civînan li dar dixe. Ev konferansa duyemîn e ku Tora Aştiyê ya Rexneyî li Amedê li dar dixe. Torê di 9ê Tebaxê de li Odeya Bazirganî û Pîşesaziyê ya Amedê “Komxebata Aştiyê ya Amedê” bi beşdariya gelek rêxistin û saziyên sivîl li dar xist.
Ferda Fahrîoglû yek ji Akdemîsyenên Aştiyê ye. Akademîsyenên Aştiyê di sala 2016an de bi boneya li ber şer rabûn û gotin em nabin şirîkê vî sûcî ji wezîfeyên xwe hatin avêtin û îxrackirin. Piştî 10 salan vaye dîsa aştî tê axaftin û her kes dixwaze li şûna şer aştiyek mayînde pêk were.
Akademîsyen Ferda Fahrîoglû ji Sekreterya Tora Aştiyê ya Rexneyî ye û wê axaftina destpêkê ya komxebatê kir. Here wiha komxebat ji aliyê wê û hevalên wê ve hate birêvebirin.
Ferda Fahrîoglû têkildarî pêvajoya “Aştî û Civaka Demokratîk” û avakirina Komîsyonê ji Ajansa Welat re axivî. Fahrîoglû dibêje ji bo doza aştiyê ew ji ya xwe ve nehatin xwarê û vaye dîsa dewlet neçar maye ku dîsa aştiyê pêk bîne.
‘Avakirina komîsyonê tenê têr nake’
Ferda Fahrîoglû diyar kir ku komîsyona ku hate avakirin, di vê komîsyonê de tenê parlamenter hene û got: “Ev bi tene têr nake, em dixwazin ku di nava vê komîsyonê de komîsyonên cuda jî hebin. Em li Amedê bi nêzîkî 50 saziyên sivîl re hatin cem hev û em li ser aştiyê axivîn. Me got, em dikarin rêyek çawa nîşanî komîsyonê bidin. Piştî vê civînê em ê raporekê jî binivisînin û bidin komîsyonê. Em ê di rapora xwe de bibêjin ‘me li Amedê van civînan li dar xistiye’. Saziyên sivîl çi dixwazin? Li gorî min ev komîsyon pirr baş e û girîng e. Lê ev komîsyon bi tenê ne bes e. Yanî di komîsyonê de bila tenê behsa çekdanînê neyê kirin. Ji bo çekdanînê dê çawa bibe û çi bikin? Ev gerîla dê an jî rewşa hemû gerîlayan çawa bibe? Dê çawa werin û çi bikin? Ji ber ku ev pirsgirêk bi deh salana ye berdewam dike. Ji ber vê yekê pirsgirêk tenê bi çekdanînê naqede. Di her alî de divê tişt çêbibin û ji bo ziman, nasname, yên ku di girtîgehan de ne û daxwazên gelê Kurd tişt bên kirin.”
‘Divê komîsyon mafan binase’
Ferda Fahrîoglû diyar kir ku ew jî wek akademîsyenekê ji ber ku aştiyê xwestiye ji wezîfeya xwe hatiye îxrackirin û axaftina xwe wiha domand: “Bi hezaran însan weke me hene, ew jî hatin îxrackirin. Ji ber ku akademîsyenan dawa aştiyê kir ev dibe deh sal îxrackirî ne, me qet tu tiştek jî negotibû. Bi tenê me gotibû, dewlet li vir sûcekî dike, li vir qetlîamek dike û em jî nabin şirîkên vî sûcî. Ji ber vê yekê em dixwazin ev tişt biqede û aştiyek mayînde pêk were. Ger ku îro qala aştiyê tê kirin divê her du alî jî bên cem hev û biaxivin. Divê ew kesên ku hatine girtin bên berdan. Daxwazên herî bingehîn ev in, divê van daxwazan bi cih bînin. Komîsyonê divê mafên jinan, yên ku hatine qatilkirin, ekolojî, ciwan û hwd. gelek tişt çareser bike. Divê ji bo van kesên ku hestiyên zarokên xwe negirtine ji bo wan jî çareseriyek bê dîtin. Dema ku van tiştan bên çareserkirin em ê wê deme zanibin ku gelek tişt tên çareserkirin.”
‘Divê bi Abdullah Ocalan re hevdîtin bên kirin’
Ferda Fahrîoglû destnîşan kir ku ew daxwaz dikin ku komîsyon bi Abdullah Ocalan re hevdîtinê bike û ev yek anîn ziman: “Divê di vê mijarê de amademîsyen û hin kesên din bi Abdullah Ocalan re hevdîtinan bikin. Jixwe dewletê jî gotiye kesên ku di komîsyonê de cih bigirin dê hevdîtanan bikin. Li Ewropayê jî kampanya hat çêkirin bi hezaran kes gotin em dixwazin bi Abdullah Ocalan re hevdîtinê bikin. Heyetek biyanî hate Tirkiyeyê û gotin ‘em dixwazin bi Abdullah Ocalan re hevdîtinê bikin’. Birêz Ocalan di girtigehê de ye û nikare bi rola xwe rabe. Mînaka Nelson Mandella heye. Divê ku birêz Ocalan jî bi azad dikaribe bi rola xe rabe.”
