Komeleya Navenda Lêkolînên Ziman, Çand û Hunerê ya ARSÎSAyê li sûka Erdîşê avahiya xwe ya nû bi girseyî vekir.
Komeleya Navenda Lêkolînên Ziman, Çand û Hunerê ya ARSÎSAyê ku li navçeya Erdîşa Wanê xebatên ziman, çand û hunerê bi rê ve dibe, vekirina cihê xwe yê nû bi girseyî pêk anî. ARSÎSAyê li sûka bajêr avahiya xwe ya nû vekir û banga xwedî derketina li zimanê Kurdî kir. Dayikên Aştiyê, Hevşaredara Erdîşê Guler Temel, rêveberên Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) ên Erdîşê, MEBYA-DER, TUHAY-DER, nûnerên saziyên sivîl û gelek welatî tev li merasîma vekirina avahiya nû ya ARSÎSAyê bûn.
‘Kurdî dengê xwezayê ye’
Di merasîma de ewilî mamosteyê zimanê Kurdî Mahmûd Pala axivî û diyar kir ku ev komele li dijî bişaftin û tunekirina zimanê kurdî hatiye damezrandin. Mahmûd Pala destnîşan kir ku ew pêşengiya ziman dikin û ew dê zimanê Kurdî têxin nava hemû qadên jiyanê. Mahmûd Pala diyar kir ku ziman nexişandina stran, helbest, wêje û dengê xwezayê ye û got: “Xwedî derketina ziman, xwedî derketina xwe ye. Ew dibêjin ‘turkçe konûş çok konûş’ û em jî dibêjin ‘biaxive Kurdî biaxive’.”
Hevseroka ARSÎSAyê Merve Borazan Keleş jî anî ziman ku xwedî derketina ziman rûmet e û diyar kir ku hêviya wan ew e ku ev komele bibe sedema pêşveçûyîna zimanê Kurdî. Merve Borazan Keleş bi bîr xist ku divê her kes di nava jiyana xwe ya rojane de bi zimanê Kurdî biaxive û beşdarab silav kir.
Dû re qurdeleya avahiya nû ji aliyê rêveberên ARSÎSA û Dayikên Aştiyê ve hat birîn û bi tilîliyan ketin hundirê avahiya nû. Merasîma vekirinê li ber stranan bi dawî bû.
