Li navçeya Şaxê ya Wanê ji ber ku ku welatî bi tevî wesayîtên xwe ve tev li pîrozbahiyên serketina Amedsporê bûne, serê wesayîtê 90 hezar lîre cezayê trafîkê li wan hatiye birîn.
Tîma Kurd Amedspor ku weke “Tîma Neteweyî ya Kurd” tê pênasekirin, di maça 2yê Gulanê de bi hevrikê xwe re wekhev ma û derket Lîga Sûperê ya Tirkiyeyê. Piştî maçê alîgirên Amedsporê di serî de li bajar û navçeyên bakurê Kurdistanê, li Rojava û Başûrê Kurdistanê û li gelek deverên cîhan derketin kolanan û serkeftina Amedsporê pîroz kirin.
Li navçeya Şaxê ya Wanê jî bi sedan welatiyên ku alîgirên Amedsporê ne, bi tevî wesayîtên xwe ve tev li pîrozbahiya serkeftina Amedsporê bûn û bi wesayîtên xwe Amedsporê pîroz kirin. Hat zanîn ku polîsên trafîkê ji ber ku wesayît tev li pîrozbahiyan bûne, li gelek wesayîtan serê hebê 90 hezar lîre “cezayê trafîkê” biriye.
Welatiyên ku nerazîbûn nîşanî vê yekê dan diyar kirin ku beriya niha ji bo Galatasarayê jî heman konvoy hatine li navçeyê pîrozbahî li dar xistin, lê tu ceza ji bo wan nehatiye birîn. Hat zanîn ku welatî dê îtîrazî cezayê hatiye birîn, bikin.
Hejmara wesayîtên ku li wan ceza hatiye birîn nehat zanîn û hate gotin dibe ku hejmara wesayîtên ceza li wan hatiye birîn, zêdetir bibe.
