Amed – Endamên Meclisa Ciwanan a DEM Partiyê Sûltan Yorûlmaz û Azad Ozer destnîşan kirin ku ji bo azadiya Rêberê Gelê Kurd Abdullah Ocalan di 1ê Nîsanê de meşekê didin destpêkirin û wiha gotin: “Em bang li hemû ciwanan dikin ku tev li vê meşa pîroz bibin û em vê têkoşînê bi azadiyê tacîdar bikin.”
Endamên Meclisa Ciwanan a Partiya Wekhevî û Demokrasiyê ya Gelan (DEM Partî) dê di navbera 1 û 4ê Nîsanê de bi dirûşma “Em bi civaka demokratîk re ber bi azadiyê ve dimeşin” meşekê li dar bixin. Ciwan dê di 1ê Nîsanê de ewilî têkildarî meşê li Qada Şêx Seîd a navçeya Yenîşehîr a Amedê daxuyaniyê bidin û dû re ber bi gundê Amarayê yê navçeya Xelfetî ya Rihayê ve dest bi meşê bikin. Dê bi sedan ciwan 4 rojan bimeşin. Ciwanên ku ji Amedê derkevin rê, dê di navçeyên Sêwereg, Hîlwan û Xelefetiyê re bimeşin û di 4ê Nîsanê de bigêjin Amarayê. Endamên Meclisa Ciwanan a DEM Partiyê Sûltan Yorulmaz û Azad Ozer têkildarî meşê axivîn.
‘Rol û mîsyona ciwanan pir girîng e’
Endama Meclisa Ciwanan Sûltan Yorûlmaz, bal kişand ser banga Rêberê Gelê Kurd Abdullah Ocalan û wiha got: “Bang di serî de ji bo jinên ciwan ji bo hemû cîhanê pir watedar bû. Ji ber wê li herêmê kelecaneke pir cuda hate jiyîn. Rol û mîsyona ciwanan jî li vir pir girîng e. Piştî daxuyaniya Rêberê Gelê Kurd Abdullah Ocalan di 8ê Adarê de jinên ciwan û ciwanan qad tejî kirin. Li qadên Newrozê peyama Rêberê Gelê Kurd hate hembêz kirin. Ev pir bi wate bû.”
‘Em barekî mezin didin ser milê xwe’
Sûltan Yorûlmaz, da zanîn ku ji sala 2009an vir ve cara ewil meşeke bi vî awayî tê lidarxistin û wiha berdewam kir: “Piştî şehadeta heval Mehsûm û Mistefa ev meş ji bo me pir girîng e. Banga Rêberê Gelê Kurd Abdullah Ocalan a aştî û civaka demokratîk li holê ye. Em barekî mezin didin ser milê xwe. Ji ber wê me got em ê ji Amedê heta Amarayê bimeşin. Ev rihê ku ji 27ê Sibatê ve di Kurdistanê de hatiye avakirin divê em bi azadiyê tacîdar bikin. Banga Rêberê Gelê Kurd hêviyek da civakê. Ne tenê ji bo gelê kurd ji bo hemû gelên bindest, hemû cîhanê watedar e. Ji ber wê me hewcehî pê dît ku em vê meşê li dar bixin.”
‘Pêşengên vê têkoşînê ciwan in’
Sûltan Yorûlmaz bang li hemû ciwanan kir ku xwedî li meşa wan derkevin û axaftina xwe wiha bi dawî kir: “Armanca me ya herî mezin azadiya fizîkî ya Rêberê Gelê Kurd Abdullah Ocalan e. Ji ber ku hêviyeke me ya mezin ji banga wî heye. Barekî pîroz e îro me daye ser milê xwe. Pêşengên vê têkoşînê ciwan in. Em bang li hemû jinên ciwan û ciwanan dikin vî barê pîroz bigirin ser milê xwe, tev li vê meşa pîroz bibin ku em vê têkoşînê bi azadiyê tacîdar bikin.”
‘Ji bo azadiya Rêberê Gelê Kurd dimeşin’
Endamê Meclisa Ciwanan Azad Ozer jî destnîşan kir ku ji bo azadiya Rêberê Gelê Kurd Abdullah Ocalan vê meşê didin destpêkirin û dê di 4ê Nîsanê de rojbûna Abdullah Ocalan pîroz bikin. Azad Ozer meşa ku didin destpêkirin weke “Meşa Azadiyê” penase kir û wiha got: “Bila ciwan, dayik gelê me yê kurd tev piştgiriyê bidin meşa me. Em bang li ciwanan dikin ku ji bo azadiya Rêber Apo tev li vê meşê bibin.”
